Roberto yavuze amagambo akomeye kuri Arthur na Pius bamugobotse ari mu bukene
Robert Banda [Roberto], umuhanzi w’icyamamare muri Zambia yavuze ku buryo akimara gushinga urugo yagobotswe bikomeye n’abahanzi bo mu Rwanda, abashimira yivuye inyuma ko atazibagirwa ineza yabo icyo gihe yari afite ubukene bukomeye.
Ni ubutumwa yasohoye yishimira intera yagezeho mu muziki n’amahirwe yamusekeye nyuma y’igitaramo cye cya mbere hanze ya Zambia, yagikoreye mu Rwanda bimufungurira amarembo ku bindi bihugu birenga icumi atangira gusarura amafaranga menshi abikesha umuziki we.
Roberto kuri uyu wa 7 Gicurasi 2019 ubwo yibukaga umunsi yagereye i Kigali ari kumwe n’umugore we mu myaka ine ishize yahaboneye impinduka zikomeye mu buzima bwe ku buryo adateze kubyibagirwa kandi bimuha imbaraga mu bikorwa akora umunsi ku wundi.
Ku nshuro ya mbere yataramiye i Kigali hari tariki 9 Gicurasi 2015. Yari yitabiriye igitaramo cy’urwenya cya “Arthur Amplified”. Yagikoze nyuma y’ibyumweru bitatu gusa akoze ubukwe. Icyo gihe yatumiwe mu Rwanda biturutse ku ndirimbo ye yari ikunzwe bidasanzwe yitwa “Amarula” ari nay o yamuzamuye cyane mu muziki.
Roberto yakomoje kuri ibyo bihe abinyujije kuri Instagram ye, ati “Nibwo nari nkimara kurushinga. Ubukwe n’ibijyanye nab wo byansize iheruheru. Nagiye mu Rwanda mpamagariwe akazi, nari nambaye ikote ryanjye ry’ubukwe nitabira igitaramo cyahinduye urugendo rwanjye mu muziki.”
Yakomeje ati “Ndashimira cyane umuvandimwe Deejay Pius twamenyanye biturutse kuri General Ozzy [Uyu ni umuhanzi ukomeye muri Zambia]. Yampuje na Arthur mu gikorwa cye cy’ibitaramo by’urwenya. Kuva uwo munsi nagenze ibihugu birenga icumi mbasangiza umuziki wanjye.”
“Ndashaka gushimira Imana kungeza aho ndi ubu, niyo izi aho urugendo rwanjye runganisha. Kandi mfite ishimwe ku bushuti nyakuri n’urukundo nyarwo rwa kivandimwe. Umugisha kuri buri wese wagize uruhare mu rugendo rwanjye, uwashyize ukuboko mu mateka yanjye. Twandikana ibitabo by’amateka hamwe. Mugire umugisha utagabanyije.”
Roberto amaze kuza mu Rwanda inshuro nyinshi mu myaka ishize. Yahakoreye ibitaramo bikomeye birimo icyo yavugiyeho imyato Inshuti ze no mu Kuboza 2015, yaje kwitabira igitaramo cyo kumurika album ya Two4Real icyo gihe DJ Pius yaririmbagamo cyane ko umubano wabo utigeze ucogora na magingo aya. Icyo gihe yazanye na mukuru we General Ozzy.
Roberto ni umwe mu bahanzi bo muri Zambia banditse izina ku mugabane wa Afurika. Azwi mu ndirimbo zinyuranye nka “Into U” “Vitamin U” yakoranye na Vanessa Mdee, Teamo yakoranye na Butera Knowless, Amarulah yatumye yamamara n’zindi.
Ibitekerezo