REG BBC izahagararira u Rwanda mu irushanwa rya Basketball Africa League rigiye kuba ku nshuro ya kabiri (BAL 2022) yisanze mu itsinda rya mbere ryiswe "Sahara Conference. "

Ni nyuma ya tombola yabaye ku munsi w’ejo hashize ku wa Kabiri tariki ya 8 Gashyantare 2022 ibera Dakar muri Senegal ku cyicaro gikuru cya BAL, ni umuhango wayobowe na n’umuyobozi wa BAL, Amadou Gallo Fall.

REG BBC yegukanye shampiyona ikaba ari yo izahagararira u Rwanda muri iri rushanwa, yisanze mu itsinda rya mbere rya "Sahara Conference " kumwe n’amakipe US Monastir yo muri Tunisia yakinnye umukino wa nyuma wa BAL 2021, AS Salé (Maroc), SLAC (Guinée), DUC (Sénégal) na Ferroviário da Beira (Mozambique).

Itsinda rya kabiri “Nile Conference” rigizwe n’ikipe ya Zamalek (Misiri) ifite igikombe giheruka (2021), BC Espoir Fukash (RDC), Cape Town Tigers (Afurika y’Epfo), Cobra SC (Sudani y’Epfo), FAP (Cameroun) na Petro de Luanda (Angola).

Iri rushanwa rizakinirwa mu mijyi 3 harimo Dakar izakira itsinda rya mbere aho amakipe azahura hagati yayo maze ane ya mbere abone itike ya 1/4, imikino izaba hagati ya tariki ya 5 na 15 Werurwe 2022.

Itsinda rya 2 rizakinirwa Cariro mu Misiri hagati ya 9 n’iya 19 Mata 2022, iri tsinda naryo amakipe 4 ya mbere azabona itike ya 1/4.

Aziyunga kuri 4 yo mu itsinda rya mbere abe 8 ubundi ahurire i Kigali mu mikino ya 1/4, 1/2 n’umukino wa nyuma bizabera muri Kigali Arena guhera tariki ya 21 kugeza 28 Gicurasi 2022.

BAL 2021 nayo yabereye i Kigali, yegukanywe na Zamalek itsinze US Monastir ku mukino wa nyuma 76-63, Patriots BBC yari ihagarariye u Rwanda yasoreje ku mwanya wa 4.

Tombola yabaye ku munsi w'ejo hashize

)