Rayon Sports itsindiwe Nyagatare na Sunrise FC mu mukino w’umunsi wa 5 wa shampiyona y’icyiciro cya mbere mu Rwanda mu mupira w’amaguru umwaka w’imikino wa 2019-2020 ibura amahirwe yo kurara ku mwanya wa mbere.

Ni umukino Rayon Sports yagiye gukina ibizi neza ko niwutsinda iri burare ku mwanya wa mbere.

Ntiyaje guhirwa n’uyu mukino kuko Sunrise yaje kubatsinda ibitego 2 kuri kimwe.

Ni umukino Sunrise yatangiye isatira cyane ishaka igitego mu minota ya mbere y’umukino, byaje kubahira ku munota wa 19 ubwo umugande Suleiman Majanjaro yafunguraga amazamu.

Rayon Sports yashatse uburyo yishyura iki gitego ariko igice cya mbere kirangira ari 1 cya Sunrise ku busa bwa Rayon Sports.

Sunrise yatangiye igice cya kabiri n’ubundi isatira cyane ishaka igitego cya kabiri ariko amahirwe Babuwa Samson yabonye ntiyayabyaza umusaruro.

Ku munota wa 69, Mugisha Gilbert yishyuriye Rayon Sports ku mupira yari ahawe na Michael Sarpong.

Sunrise yari mu rugo yashyize Rayon Sports ku gitutu ishaka igitego cya kabiri maze ku munota wa 87, Babuwa Samson yarengeje umupira Irambona awuha Mwangi Pius wahise aterera ishoti rikomeye inyuma gato y’urubuga rw’amahina maze umupira uyoboka mu izamu. Umukino urangira ari 2-1.

Nyuma yo gusa nashyamirana n’umusifuzi, rutahizamu wa Rayon Sports, Michael Sarpong yahawe ikarita y’umutuku ku munota wa 92.

Dore imikino y’umunsi 5 yose iteganyijwe n’iyarangiye

Ku wa Gatanu tariki ya 25 Ukwakira 2019

Police FC 2-0 Heroes FC (Stade de Kigali, 15h00)
SC Kiyovu 1-0 Gicumbi FC (Mumena Stadium, 15h00)
Espoir FC 2-1 Musanze FC (Stade Huye, 15h00)

Ku wa Gatandatu tariki ya 26 Ukwakira 2019

Mukura VS 2-1 Gasogi United (Stade Huye, 15h00)
Bugesera FC 0-2 Etincelles FC (Stade Bugesera, 15h00)
AS Kigali 1-0 Marines FC (Stade de Kigali, 15h00)
Sunrise FC 2-1 Rayon Sports FC (Stade Nyagatare, 15h00)

Ku Cyumweru tariki ya 25 Ukwakira 2019

APR FC vs AS Muhanga (Stade de Kigali, 15h00)

)