Ikipe y’igihugu Amavubi mu kanya igiye gucakirana na Ethiopia mu mukino wo kwishyura mu gushaka itike ya CHAN 2020, Mashami akaba yakoze impinduka zigera kuri 3 ugereranyije n’ababanjemo mu mukino ubanza.

Ni umukino uteganyijwe ku isaha ya saa 15:30’ kuri stade Regional i Nyamirambo.

Mu mukino ubanza Amavubi y’u Rwanda yabashije gutsinda igitego 1 ku busa, bikaba bivuze ko mu gihe Amavubi yabasha kunganya mu mukino wo kwishyura yahita abona itike ya CHAN 2020 izabera muri Cameroun.

Mu bakinnyi 11 bari bubanze mu kibuga, nta mpinduka zabayeho ku rutonde ejo ikinyamakuru ISIMBI cyari cyatangaje ko bashobora kubanza mu kibuga.

Nk’uko Isimbi yabashije kubona uru rutonde, Mashami yakoze impinduka 3 ugereranyije n’bakinnyi bari babanje mu kibuga ku mukino ubanza, aho umunyezamu Bakame yavuyemo hakinjiramo Kimenyi Yves utarakinnye umukino ubanza kubera ikibazo cy’ibyangomba.

Haruna Niyonzima nawe utarakinnye umukino ubanza kubera ibyangombwa yinjiyemo mu mwanya wa Iranzi Jean Claude mu gihe Nsabimana Aimable yafashe uwa Ange Mutsinzi ufite imvune.

Amavubi aramutse asezereye Ethiopia, byaba ari inshuro ya kabiri ayikuyeho itike ya CHAN kuko na CHAN ya 2018 yabereye muri Moroc, u Rwanda itike rwayikuye kuri Ethiopia.

Dore 11 bagiye kwifashishwa kuri uyu mukino

Umunyezamu: Kimenyi Yves

Ba myugariro: Omborenga Fitina, Imanishimwe Emmanuel Mangwende, Manzi Thierry na Nsabimana Aimable

Abakina hagati: Niyonzima Olivier Sefu, Nshimiyimana Amran, Nsabimana Eric Zidane, Haruna Niyonzima

Ba rutahizamu: Sugira Ernest na Manishimwe Djabel

)