Ikipe ya Bugesera FC yirukanye umutoza wa yo Ndayiragije Etienne nyuma y’umwaka ayitoza.
Nta mpamvu y’icyo bapfuye bavuze uretse itangazo iyi kipe yashyize hanze mu rukerera rwo kuri uyu wa Kabiri ivuga ko batandukanye ku bwumvikane.
Yagize iti " Ku bwumvikane bw’impande zombi, ubuyobozi bw’ikipe ya Bugesera FC n’umutoza Etienne Ndayiragije, basheshe amasezerano y’akazi. Ikipe iraba itozwa n’abasigaye muri staff technique mu gihe hagishakwa undi mutoza mukuru. Kwitegura imikino yo kwishyura birakomeje."
Ndayiragije Etienne yinjiye muri Bugesera FC muri Mutarama 2022 asimbura Mbarushimana Abdou wari wirukanywe.
Iyi kipe yayisanze ku mwanya wa 10 ayifasha gusoza ku mwanya 8 muri shampiyona ya 2021-22.
Bugesera FC yahise imwongerera amasezerano y’imyaka 2 akaba yari asigaje umwaka n’igice w’amasezerano.
Atandukanye na Bugesera FC nyuma y’uko ku munsi w’ejo hashize ku wa Mbere yari yakoresheje imyitozo nimugoroba bitegura imikino yo kwishyura ya shampiyona ya 2022-23. Asize Bugesera FC ku mwanya wa 12 n’amanota 18.
Ikipe iraba itozwa n’abari bamwungirije mu gihe hagishakishwa umusimbura we.
Ibitekerezo