Imikorere idahwitse ya Komisiyo y’amarushanwa muri FERWAFA ndetse n’ubunyamabanga mu kwica amategeko nkana y’igikombe cy’Amahoro byatumye hafatwa icyemezo kidafite itegeko rikirengera.

Harabura iminsi mike ngo ukwezi kuzure Intare FC na Rayon Sports bari mbiri mbiri ku kibazo cy’umukino wo kwishyura wa 1/8 cy’igikombe cy’Amahoro cya 2023 wagombaga kuba warabaye tariki ya 8 Werurwe 2023.

Iyo ukurikije amategeko agenga iriushanwa ry’Igikombe cy’Amahoro 2023 usanga muri iki kibazo Intare FC na Rayon Sports nta n’imwe ifite amakosa ahubwo FERWAFA yagaragaje guhuzagurika no kudakurikiza amategeko guhera ku munsi wa mbere w’iki kibazo kivuka.

Uyu mukino wagombaga kubera kuri Stade ya Muhanga tariki ya 8 Werurwe 2023 ariko kubera ko habereyemo ibikorwa by’aka Karere byo kwizihiza umunsi w’abagore wari wimuriwe kuri Stade ya Bugesera kuri iyo tariki saa 12h30’.

Mu gitondo cyo kuri uyu wa Gatatu tariki ya 8 Werurwe 2023, FERWAFA yandikiye Rayon Sports na Intare FC izimenyesha ko uyu mukino wasubitswe uzakinwa ku wa Gatanu tariki ya 10 Werurwe 2023 kubera impamvu 2.

Muri iyi baruwa yasinyweho n’umunyamabanga wa FERWAFA, Muhire Henry yagize iti “Dushingiye ko Stade ya Bugesera yagombaga kwakira imikino 2 ya 1/8 cy’amarushanwa y’igikombe cy’Amahoro ku munsi umwe. Dushingiye ko iyo Stade yavuzwe haruguru idafite amatara ashobora kwitabazwa mu gihe hakenerwa iminota y’inyongera ku mikino yombi. Turabamenyesha ko umukino wagombaga kubahuza wimuriwe tariki ya 10 Werurwe 2023.”

Gusa iyo ukurikije ibyanditswe mu ibaruwa bihabanye cyane n’amategeko agenga amabwiriza y’igikombe cy’Amahoro 2023 aho yari yamaze kwica amategeko 2 aho irya mbere ari ingingo ya 10.4 ivuga ko iyo amakipe anganyije mu mikino yombi hahita hitabazwa penaliti kereka ku mukino wa nyuma iyo amakipe anganyije hongerwaho iminota 30.

Iyi ngingo igira iti “nyuma y’iminota 90 umukino, iyo ntawatsinze hazitabazwa penaliti kugira ngo hamenyekane uwatsinze kuva ku cyiciro cya mbere kugeza muri ½. Iyo ntawatsinze ku mukino wa nyuma, hitabazwa iminota y’inyongera buri gice kikagira iminota 15 kugira ngo hagaragare uwatsinze.”

Irindi tegeko ryari ryishwe ni irijyanye n’igihe cyo kumenyekanisha ikibuga kuko mbere yo kwemerera Rayon Sports kwakirira kuri Stade ya Bugesera yakabaye yasubitse uyu mukino kuko Rayon yamenyesheje FERWAFA ko ikibuga isanzwe ikiniraho kidahari tariki 7 Werurwe 2023, iki kijyana no gusubika umukino ku munsi uri bubereho kandi amategeko agenga amarushanwa muri FERWAFA avuga ko impinduka ku mukino zitangazwa amasaha 48 mbere y’uko ukinwa.

Rayon Sports yari yasabwe kumenyesha ikibuga kizakira uyu mukino bitarenze saa 12h00’ zo ku wa 8 Werurwe 2023 ni mu gihe umukino wari washyizwe ku wa 10 Werurwe 2023.

Nyuma yo gukora inama yiga kuri iyi baruwa yari yandikiwe na FERWAFA, Rayon Sports yasanze byaba ari agasuzuguro kuko umukino wasubitswe habura amasaha make ngo ube maze Rayon Sports yandika isezera mu gikombe cy’Amahoro.

Tariki ya 10 Weruwe 2023 Rayon Sports yanditse ivuga ko nyuma y’ibiganiro na FERWAFA yemeye kugaruka mu gikombe cy’Amahoro, mu gihe Intare FC yari yiteguye gukina yatunguwe no kubona ibaruwa ya ivuga ko umukino bazamenyeshwa igihe uzabera kuko Rayon Sports yemeye kugaruka mu irushanwa. Yavuze ko itari inazi ko yikuye mu irushanwa.

Tariki ya 25 Werurwe, FERWAFA yandikiye Intare FC na Rayon Sports ibamenyesha ko umukino uzaba tariki ya 27 Werurwe.

Intare ikaba yarateye utwatsi iki cyemezo yafashe nk’agasuzuguro, yandikira FERWAFA iyimenyesha ko mu gihe cyose itamenyeshejwe impamvu uyu mukino utabaye itariki yari iteganyijwe, ititeguye kuwukina ahubwo FERWAFA yazaba ari yo ikina na Rayon Sports.

Iti "Twasanze iby’umukino uteganyijwe mu ibaruwa no137/FERWAFA/2023 twe bitatureba, kuko inama zose zijyanye na wo nta n’imwe twatumiwemo, impande zitabiriye zikaba ari zo zizawukina."

FERWAFA ikaba yarahisemo gukuraho uyu mukino aho uyu mukino maze tariki ya 27 Werurwe 2023 saa 15h ku biro bya FERWAFA hatumizwaho inama yagombaga guhuza impande zose (Rayon Sports, Intare FC na FERWAFA) ziga kuri uyu mukino ariko perezida wa Intare FC ntiyahaboneka.

Rayon Sports na Intare FC zagonganishijwe na FERWAFA

Perezida wa FERWAFA yaje gufata umwanzuro ikirego agishyira muri Komisiyo y’Ubujurire aho ku wa Mbere w’iki cyumweru yabakiriye maze yumva impande zombi.

Bavuye imuzi iki kibazo maze Intare FC ivuga ko bo bumva Rayon Sports kuba yarasezeye mu irushanwa, ntitange ikibuga ku gihe ikwiye gusezererwa mu gikombe cy’Amahoro maze Rayon Sports ivuga ko kuba yarasezeye ari uko hari ibyo itishimiye kandi bimaze gukemurwa yagarutse kandi yagaruwe n’urwego rubifitiye ububasha (FERWAFA).

Iyi Komisiyo nyuma y’amasaha arenga 24 yatangaje umwanzuro, yasanze icyifuzo cya Intare FC ko Rayon Sports yaterwa mpaga nta shingiro gifite kuko amategeko y’igikombe cy’Amahoro 2023 ateganya uko mpaga iterwa kandi bitandukanye n’ibyo Intare FC ivuga.

Ikindi ni uko kuba Rayon Sports yarikuye mu irushanwa ngo byagombaga gusaba ko komisiyo ishinzwe amarushanwa iterana ikemeza ko yavuyemo ariko kuba yaravuyemo ikaza kugaruka igaruwe n’urwego rubifitiye ububasha nta kosa yakoze.

Aha ni ho yashingiye ivuga ko icyemezo cya komisiyo y’amarushanwa yateranye ku wa 20 Werurwe 2023 kitahindutse.

Komisiyo y’Ubujurire yemeje ko Rayon Sports na Intare FC zizakina umukino wo kwishyura wa 1/8 w’igikombe cy’Amahoro. Itariki uzakinirwaho wakazawumenyeshwa na FERWAFA. Umukino ubanza warangiye Rayon Sports itinze 2-1.

Bagendeye ku myanzuro ya komisiyo itarateranye

Ku nshuro ya mbere ubwo Komisiyo y’Ubujurire yari yatumijeho Rayon na Intare FC hari tariki ya 1 Mata 2023 Komisiyo y’Ubujurire yasabye aya makipe kugaruka ku wa Mbere (tariki ya 3 Mata 2023) kubera ko hari amakuru bari badafite kuri iki kibazo.

Mu ibaruwa yandikiwe Intare FC imenyeshwa umukino wa tariki ya 27 Werurwe 2023 na Rayon Sports, yabwiwe ko ikirego cya bo Komisiyo y’Amarushanwa muri FERWAFA yateranye tariki ya 20 Werurwe 2023 yasanze nta shingiro gifite bityo ko bagomba gukina uyu mukino.

Bivugwa ko Intare FC yasabye iyi Komisiyo y’Ubujurire iyo myanzuro ya Komisiyo y’amarushanwa yagendeweho batesha agaciro ikirego cya bo maze barayibura, ni mu gihe ngo iyi kipe yari afite amakuru ko iyi komisiyo itateranye.

FERWAFA yagize ikikango ijya kumvikana na Rayon Sports

Amategeko y’igikombe cy’Amahoro 2023 arasobanutse aho ingingo ya 13.2 ku bijyanye n’uko ikipe ishobora kuva mu irushanwa, iteganya ko ikipe ivuye mu irushanwa ryatangiye umwaka utaha itarikina ndetse ikanishyura amande y’ibihumbi 500.

Igira iti “kwikuramo irushanwa ryatangiye ni ukuvuga nyuma ya tombola y’ijonjora ry’ibanze ikipe izacibwa amande y’ibihumbi 500 Frw yashyizweho na komite ishinzwe irushanwa ku bwo kwikura mu irushanwa ndetse inabuzwe kwitabira Igikombe cy’Amahoro cy’umwaka ukurikiyeho wa 2024.”

FERWAFA aho kwemera uku kwikura muri iki gikombe cy’Amahoro, yaciye ruhinga nyuma kuko yari izi amakosa yakoze maze ijya kumvikana na Rayon Sports iyigarura mu gikombe cy’Amahoro.

Byaraniye umukino ugumyeho

)