APR FC ibaye ikipe ya mbere ikuye amanota 3 i Nyagatare, ni nyuma yo gutsindira Sunrise FC kuri Golgotha Stadium ibitego 4-2 mu mukino w’umunsi wa 10 wa shampiyona umwaka w’imikino wa 2019-2020, Gasogi United yo yatsindiye Gicumbi i Nyamirambo.

Umukino wabereye i Nyagatare kuri Stade Golgotha, Sunrise yari yakiriye APR FC iyoboye urutonde rwa shampiyona n’amanota 21, mu mikino 5 Sunrise FC yari itarahatsindirwa, yashakaga gukomeza kurinda ibigwi byayo kuri iki kibuga.

Sunrise FC niyo yinjiye mu mikino neza ku munota wa 13 ihita itsinda igitego cya mbere cyatsinzwe na Babuwa Samson.

Ku munota wa 18 Nizeyimana Djuma yishyuriye APR FC, ku munota wa 28 Usengimana Danny ayitsindira igitego cya 2.

Sunrise FC yakomeje gushaka uburyo yishyura ariko igice cya mbere kirangira ari 1-2.

Sunrise FC yatangiye igice cya kabiri ishaka kwishyura iki gitego maze ku munota wa 48 Babuwa Samson yongera kunyeganyeza inshundura biba 2-2.

Ku munota wa 72, Vivien yahawe ikarita itukura nyuma y’ikosa yakoreye Mugunga Yves, iyi kufura yaje kuvamo igitego cya gatatu cya APR FC cyatsinzwe na Bukuru Christophe ku munota wa 74.

APR FC yaje kubona igitego cya 4 ku munota wa 79 gitsinzwe na Nshuti Innocent kuri Penaliti. Umukino waje kurangira ari 4-2

Gutsinda uyu mukino APR FC yakomeje kuyobora urutonde rwa shampiyona n’amanota 24.

I Nyamirambo Gasogi United yari yakiriye Gicumbi FC, ni umukino igice cya mbere kitabonetsemo amahirwe menshi, gusa wabonaga Gicumbi FC ari yo irimo gusatira cyane, igice cya mbere kirangira ari 0-0.

Gasogi United yatangiye igice cya kabiri ishaka igitego ku kabi na keza, maze ku munota wa 50 Ndekwe Felix wari winjiye mu kibuga asimbuye Rugamba abonera Gasogi United igitego cya mbere kuri kufura.

Gicumbi FC yakomeje gushaka uko yakwishyura, na Gasogi ishaka kongera umubare w’ibitego ariko umukino urangira ari 1-0.

Dore imikino y’umunsi wa 10 yose iteganyijwe

Ku wa Kabiri tariki ya 26 Ugushyingo 2019

Heroes FC 3-2 Musanze FC (Stade Bugesera, 15h00)
Gasogi United 1-0 Gicumbi FC (Stade de Kigali, 15h00)
Sunrise FC 2-4 APR FC (Stade Nyagatare, 15h00)

Ku wa Gatatu tariki ya 27 Ugushyingo 2019

SC Kiyovu vs Bugesera FC (Stade Mumena, 15h00)
Police FC vs Marines FC (Stade de Kigali, 15h00)
Mukura VS vs Etincelles FC (Stade Huye, 15h00)

Ku wa Kane tariki ya 28 Ugushyingo 2019

Rayon Sports FC vs AS Muhanga (Stade de Kigali, 15h00)
Espoir FC vs AS Kigali (Stade Rusizi, 15h00)

)