Mu cyumweru gishize ni bwo ku mbuga nkoranyamabaga hakwirakwiye ifoto y’abana bakiri bato, bifotoje nk’ikipe bambaye imifuka ya sima ya CIMERWA nk’umwambaro wo gukinana, kuri ubu uru ruganda rukora sima rwamaze kubafasha aho rwabahaye imipira yo kwambara n’ibindi bikoresho.

Ubundi aba bana ni abo mu Karere ka Rutsiro, mu murenge wa Kivumu. Ifoto yabamenyekanishije yafotowe bahagaze mu muhanda wa Kanyabihombo.

Aya makuru akigera kuri uru ruganda, rwahisemo kubafasha, aho rwamaze kubashyikiriza imipira yo kwambara bazajya bakinana ndetse n’imipira yo gukina.

Yves Bayingana ushinzwe imenyekanishabikorwa muri CIMERWA, yavuze ko urugendo rwo gufasha aba bana barutangiye.

Yagize ati"inkuru y’ubushake n’imbaraga zacu mu gufasha aba bana itangiye nonaha. Gake gake hazajyaho gahunda ihamye yo gufasha aba bana b’ibitangaza."

Nk’uko babyanditse binyuze kuri Twitter yabo, bavuze ko bazabaha ubundi bufasha, ngo ibi bakoze ni uko batashakaga kuza imbokoboko mu gihe bari baje kubashaka.

Bemeje kandi ko ubu bufasha babonye buzabafasha gukomeza kwerekana impano zabo no gukunda umupira w’amaguru ukaba wababyarira umusaruro.

Bakinaga bambaye imifuka ya sima

Nyuma yo guhabwa imyambaro mishya

Bahawe n'imipira yo gukina mishya

Bahawe imipira yo kujya bakinana bakajugunya ibikarito bya sima bambaraga

)