Umuhanzi nyarwanda Mugwaneza Lambert uzwi ku izina rya Social Mula yatangaje abahanzi azifashisha amurika alubumu nshya yise « Ma vie » barimo umuhanzi w’Umurundi Big Fizzo.

Iyi alubumu ya mbere uyu muhanzi azaba ahsyira hanze izamurikwa ku wa 23 Ugushyingo 2019 muri Camp Kigali.

Muri iki gitarammo cyo kumurika alubumu, Social Mula yatumiyemo abahanzi batandukanye barimo King James uherutse gushyira hanze indirimbo “Yabigize birebire”, umuhanzi w’Umurundi Big Fizzo wakunzwe mu ndirimbo nyinshi z’urukundo nka “Ndakumisinze”, “Munyana”, “Bajou”. Uyu muhanzi kandi yaguye igikundiro cye binyuze mu ndirimbo “Indoro” yakoranye n’itsinda rya Charly&Nina.

Abandi bahanzi bazagaragara muri iki gitaramo harimo Bruce Melody uherutse gushyira hanze indirimbo “Katerina” umaze kuririmba mu bitaramo bikomeye, Yvan Buravan uherutse gushyira hanze indirimbo “Inkuru” na Album yise ‘Love Lab’, umuhanzikazi Marina Deborah ukunzwe mu ndirimbo “Ni wowe”, “Log Out” n’izindi.

Undi muhanzi Social Mula yatumiye ni Yverry uherutse gushyira hanze amashusho y’indirimbo “Imbaraga” wakunzwe mu ndirimbo “Nk’uko njya mbirota”, “Ndabigukundira”, “Umutima” n’izindi nyinshi.

Nk’uko bigaragara ku rupapuro rwamamaza imurika ry’iyi album "Ma vie" hari n’abandi bahanzi bazaririmba muri iki gitaramo bazatangazwa. Kwinjira muri iki gitaramo ni 5 000 Frw mu myanya isanzwe, 10,000 Frw muri VIP na 150, 000 Frw ku meza y’abantu umunani.

“Ma Vie” ni alubumu izaba iriho indirimbo zose yakoze mu gihe cy’imyaka itandatu amaze akora umuziki nka “Super Star”, “Ku ndunduro”, “Ndiho”, “Amahitamo”, “Isegonda” n’izindi.

Social Mula agiye kumurika iyi alubumu nyuma y’aho muri uyu mwaka yatsindiye kuba mu bahanzi 10 bahatanira igihembo cya Prix Decouvertes RFI cyegukanywe n’Umunyarwanda Yvan Buravan mu mwaka ushie.

Social Mula ni umwe mu bahanzi bahagaze neza muri iki gihe mu bakora injyana ya R&B, indirimbo ze ziganjemo iz’urukundo zifasha imitima ya benshi y’abarurimo.

Yatangiye kwamamara akorera umuziki muri Studio y’Ibisumizi ubwo yasohoraga indirimbo ze zirimo “Abanyakigali” akomereza ku zindi zirimo ’Mu buroko’ kugera kuri ’Ma Vie’ yatumye amenyekana no hanze y’u Rwanda.

)