Brazil yaraye inyagiye South Korea 4-1 birimo igitego cya Neymar watsindaga igitego cye cya mbere mu gikombe cy’Isi 2022 kirimo kubera muro Qatar maze igera muri 1/4.

Ni umukino wabereye kuri Stadium 974, Brazil yari yabanjemo abakinnyi bayo bose bakomeye, itangirana umuvuduko n’imbaraga nyinshi ibasha gutsinda ibitego byose mu minota y’igice cya mbere.

Rutahizamu Vinicius Jr wa Real Madrid ni we wafunguye amazamu ku munota wa 7’ aho yahawe umupira mwiza na Neymar, na we agacunga uko abugarizi n’umunyezamu wa Koreya bahagaze, aboneza umupira mu nshundura.

Ku munota wa 13 Brazil yabonye igitego cya kabiri, cyatsinzwe na Neymar kuri penaliti ni ku ikosa ryari rikorewe Richarlison mu rubuga rw’amahina.

Nyuma yo guhererekanya neza ku bakinnyi ba Brazil, Thiago Silva yahaye umupira mwiza Richarlson ku munota wa 29 maze atsinda igitego 3.

Ku munota wa 36 Lucas Paqueta yatsinze agashinguracumu ka Brazil, aho yakiriye umupira mwiza yari ahawe na Vinicius Junior, na we awutera adahagaritse inshundura ziba ziranyeganyeze.

Brazil yasaga n’iyamaze kwizera intsinzi. igice cya kabiri nta gitego yigeze ibona ahubwo ku munota wa 76 Koreya yabonye igitego kimwe cy’impozamarira gitsinzwe na Seung-Ho Paik.

Brazil yabaye igihugu cya Gatandatu kigeze muri ¼ cy’igikombe cy’Isi, ni nyuma y’U Bufaransa, U Buholandi, U Bwongereza, Argentine na Croatia. Amakipe asigaye azava hagati ya Marooc izakina na Espagne ndetse na Portugal izakina n’Ubusuwisi.

Brazil yageze muri 1/4

)