Nyuma y’uko Minisiteri ya Siporo iherutse gutangaza imikino yemewe mu rwego rwo rwo kwirinda icyorezo cya COVID-19, yongeye kwemeza ko guhera tariki ya 13 Nyakanga indi mikino 11 iziyongera kuyari yemewe gukorwa muri ibi bihe.

Nk’uko byari byemejwe n’inama y’Abaminisitiri idasanzwe yateranye tariki ya 2 Kamena 2020, MINISPORTS yari yafunguye imikino itandukanye ari yo; kwiruka (jogging), imikino ngororamubiri, kunyonga igare, imyitozo yo kugenda n’amaguru (hiking), Golf, Tennis, Umukino wo gutwara imodoka na Fencing (barwanisha inkota).

Mu itangazo rya MINISPORTS ryo ku wa 8 Nyakanga 2020, rivuga ko nyuma y’igenzura ryakozwe na Minisiteri ya Siporo, Umujyi wa Kigali ndetse n’Inzego z’Umutekano tariki ya 5 Nyakanga 2020, hari ibindi bikorwa bya siporo byemewe gufungurwa guhera tariki ya 13 Nyakanga 2020.

Ibyo bikorwa ni Cricket, Boxing(iteramakofe), Imikino njya rugamba(Kung Fu, Karate, Taekwondo, Judo), Skating, Kumasha, Badminton, Aerobic, Gymnastics.

MINISPORTS ikaba yabamenyesheje ko iyi mikino igomba kuzajya ibera ahantu hafunguye hubahirije amabwiriza yo kwirinda icyorezo cya COVID-19.

Minisiteri rero ikaba yasabye amafederasiyo arebwa n’iyi myanzuro gutanga ingengabihe n’aho imyitozo izajya ibera.

)