Rutahizamu w’umurundi wahoze akinira Rayon Sports, Bimenyimana Bonfils Caleb, yabonye ikipe nshya muri Kazakhstan.
Ku munsi w’ejo hashize abinyujije ku rukuta rwe rwa Instagram, Caleb yatangaje ko yamaze gusinyira ikipe ya FC Kaysar ikina mu cyiciro cya mbere muri Kazakhstan.
Iyi kipe yashinzwe mu 1968, ikaba ari imwe mu banyamuryango shingiro ya shampiyona y’icyiciro cya mbere muri Kazakhstan, imyaka itatu niyo itakinnye iyi shampiyona bitewe no kumanuka mu cya kabiri, intsinzi ikomeye yabonye ni iyo mu 1998 ubwo begukanaga igikombe cy’igihugu.
Asinyiye iyi kipe nyuma y’uko mu kwezi gushize yari yasezeye kuri FK RFS(RĪGAS FUTBOLA SKOLA) yo muri Latvia.
Muri 2019 nibwo uyu mukinnyi yatandukanye na Rayon Sports asinyira FK RFS yo mu cyiciro cya mbere muri Latvia.
Uyu mukinnyi wari wayigezemo muri Mata 2019, muri Kanama 2019 yaje gutizwa muri Atlantas, mu mpera za 2019 yasubiye mu ikipe ye aho yaje kongera kumutiza FK Pohronie yo muri Slovakia hari muri Kanama 2020, yaje kugaruka muri FK RFS mu Kuboza 2020.
Bimenyimana Bonfils utatangaje aho yerekeje, yinjiye muri Rayon Sports 2017 avuye muri Vital’o FC y’i Burundi.
Ibitekerezo