Nyuma y’uko umutoza mukuru wa APR FC n’umwungiriza we badatoje umukino wa Etoile del’Est bikavugwa ko banduye Coronavirus, umutoza w’abanyezamu w’iyi kipe, Mugabo Alex yavuze ko byatewe n’uko barwaye mu nda.

Bitunguranye mbere y’amasaha make ngo umukino wahuje Etoile del’Est na APR FC i Ngoma ngo utangire byamenyekanye ko Mohammed Adil Erradi n’umwungiriza we, Jamel Eddine Neffati batari butoze uyu mukino.

Byavuzwe ko aba batoza banduye icyorezo cya Coronavirus ari yo mpamvu batari butoze uyu mukino, watojwe n’umutoza w’abanyezamu, Mugabo Alex afatanya na kapiteni w’iyi kipe, Jacques Tuyisenge ufite imvune utarimo gukina muri iyi minsi.

Nyuma y’uyu mukino, Mugabo Alex yavuze ko impamvu abatoza bataje ari uko barwaye mu nda.

Ati "Abatoza bagize ikibazo cyo mu nda mu gitondo, twari dufite gahunda y’uko tuzana tubimenya mu gitondo ko bagize ikibazo cyo mu nda, nta kundi twe rero ku rugamba tugomba kurwana uko tuba twaratojwe, ejo twakoranye imyitozo ibintu byose twari twarabirangije nta kibazo cyarimo."

Agaruka kubivugwa ko aba batoza banduye Coronavirus ari yo mpamvu bataje, yavuze ko ntacyo abiziho.

Ati "Ayo makuru ntabwo ndayamenya kuko twasize batubwira ko ari ikibazo cyo mu nda kuko baba ahantu hamwe, bashobora kuba hari ibyo bariye bishobora kuba byabahumanya bitameze neza."

Uyu mukino waje kurangira amakipe yombi agabanye amanota aho banganyije 2-2.

Adil ngo yarwaye mu nda

Jamel Eddine umutoza wungirije wa APR FC na we ntiyabonetse

Mugabo Alex yavuze ko abatoza ba APR FC barwaye mu nda

)