Abahanzikazi nyarwanda bagize itsinda rya Charly&Nina bahishuye uko bahuye n’Umunya-Nigeria, Paul Gambit watunganyije amashusho y’indirimbo yabo bise ‘Umuti” baheruka gushyira hanze.

Charly&Nina ni abahanzi bamaze gutera intambwe ikomeye mu muziki kuko batawukorera mu Rwanda gusa ahubwo barenga n’imbibi z’Igihugu.

Uretse Bob Pro na Pastor P bagiye batunganya indirimbo zabo mu Rwanda mu buryo bw’amajwi, banayobotse Nessim w’Umugande wakoze indirimbo nyinshi zanakunzwe muri Afurika y’Uburasirazuba zirimo Gutamiiza ya Radio & Weasel na B2C, Binkolera ya The Ben afatanyije na Sheebah n’izindi nyinshi zitandukanye.

Mu mashusho y’indirimbo zabo mu Rwanda inyinshi zatunganyijwe na Meddy Saleh mu gihe bambutse imbibi z’u Rwanda bisunga Sasha Vybz, Swangz Avenue bagezweho muri Uganda ndetse na Kenny uri mu ba mbere muri Tanzania wabakoreye “Komeza unyirebere”.

Gukorana n’abatunganya indirimbo bakomeye ntirwagarukiye aha, kuko baherutse no gukorana na Paul Obata uzwi ku izina rya Paul Gambit uri mu bashinze inzu itunganya amashusho ikomeye muri Afurika ya Kurlevra Productions.

Amakuru agera ku ISIMBI avuga ko aba bakobwa babiri bahuriye na Paul Gambit muri Uganda ubwo yari afite gahunda yo gukorana na Sheebah na Orezi hanyuma baza kumenya ko ari Kampala bajya kumushaka bagirana ibiganiro birangira bumvikanye maze abakorera amashusho y’indirimno ‘Umuti’ mu guhe amajwi yayo yatunganyijwe n’Umugande, Nessim.

Paul Gambit asanzwe atunganya amashusho y’indirimbo z’abahanzi batandukanye barimo n’abakomeye muri Afurika nka Davido, Yemi Alade, Orezi n’abandi.

)