Umuririmbyi ukomeye muri Nigeria Tiwatope Savage-Balogun [Tiwa Savage] yegukanye igihembo gikomeye muri MTV Europe Music Awards (MTV EMAs) mu birori byabaye mu ijoro ryo kuri iki Cyumweru tariki ya 4 Ugushyingo 2018.

Ibirori bya MTV Europe Music Awards (MTV EMAs) byabereye ahitwa Bilbao Exhibition Center muri Bilbao muri Espagne. Tiwa Savage uri mu bagore bakomeye cyane muri Afurika yahawe icya Best African Act cyari gihataniwe n’abubatse izina.

Yari ahatanye n’abandi bahanzi bo muri Afurika barimo Davido; Distruction Boyz, Shekinah, Nyashinski ndetse na Fally Ipupa wo muri DRC.

Reuters yatangaje ko ibirori byo gutanga MTV EMAs byayobowe na Hailee Steinfeld uri no mu basusurukije abafana. Mushiki wa Michael Jackson, Janet Jackson na we yaririmbye izirimo indirimbo ye "Made for Now," anahabwa igihembo cya Global Icon Award.

Mu bandi bahanzi batwaye ibihembo, harimo Camila Cabello, Nicki Minaj, Shawn Mendes , Cardi B n’abandi mu ngeri zinyuranye.

Abandi bahanzi baririmbye muri iri joro harimo Minaj, Halsey, Rosalía, Alessia Cara, Marshmello na Jack & Jack n’abandi.

Icyiciro cya Best African cyinjijwe mu irushanwa mu mwaka wa 2005, mu rwego rwo kurushaho kuzamura umuziki wa Afurika ngo umenyekane no hanze mu yindi migabane ndetse bari banafite intego yo gusakaza umuco gakondo wa Afurika biciye mu bihangano.

Abahanzi bo muri Nigeria bamaze kwegukana iki gihembo inshuro eshatu, mu bagitwaye harimo 2Baba mu 2005, D’banj mu 2007 acyisubiza mu 2012; Davido ni we waherukaga kugitwara mu mwaka wa 2017.

)