Ikipe ya Rayon Sports iteindiwe na Sunrise kuri Stade Regional i Nyamirambo ibitego 2-0 mu mukino w’umunsi wa 20.

Rayon Sports yari yakiriye Sunrise FC kuri Stade Regional i Nyamirambo mu mukino w’umunsi wa 20 wa shampiyona y’icyiciro cya mbere umwaka w’imikino wa 2019-2020.

Rayon Sports yashakaga kwihorera kuko umukino wabereye Golgotha Stadium yari yatsinzwe ibitego 2-1.

Ni umukino watangiye wihuta cyane ubona ko amakipe yombi ashaka igitego hakiri kare.

Sunrise yaje kubona igitego ku munota wa 13 gitsinzwe na Niyibizi Vedaste ku mupira yari ahawe Twagirimana Innocent Kavatari.

Rayon Sports yakomeje gusatira cyane ishaka kwishyura maze ku munota wa 20 ibona penaliti ku ikosa ryakorewe Dagnogo ariko Rugwiro Herve ayiteye umunyezamu Shaolin awukuramo.

Rayon Sports yakomeje gusatira cyane ndetse ibona amahirwe menshi harimo kufura ya Rutanga ku ku munota wa 34 ariko umunyezamu awushyira muri koruneri.

Iyi kipe kandi yagiye ibona andi mahirwe menshi cyane cyane ku mipira y’imiterekano ariko ubwugarizi bwa Sunrise n’umunyezamu bubabera ibamba. Igice cya mbere kirangira ari 1-0.

Rayon Sports yatangiye igice cya kabiri isatira ishaka igitego cyo kwishyura, ku munota wa 52 Ciza Hussein yateye ishoti rikomeye ariko rinyura hanze gato y’izamu.

Ku munota wa 59 umunyezamu wa Sunrise yongeye gukora akazi gakomeye akuramo umupira wa Bizima Yannick mu rubuga rw’amahina.

Ku munota wa 60 Rayon Sports yahise ikora impinduka 2 havamo Ciza Hussein na Maxime hinjiramo Sugira Ernest na Mugisha Gilbert.

Ku munota wa 66 Sunrise FC na yo yakoze impinduka havamo Niyibizi Vedaste hinjiramo Ndatimana Robert.

Ku munota wa 71 Sunrise FC yabonye igitego cya kabiri gitsinzwe na Babuwa Samson ku ishoti rikomeye yatereye inyuma y’urubuga rw’amahina maze Kimenyi Yves awufashe ntuyawukomeza uboneza mu rushundura.

Ku munota wa 78 Sunrise yakoze impinduka za kabiri havamo Kavatari hinjiramo Sinamenye Cyiprien.

Rayon Sports yakomeje gushaka uburyo uburyo igombora ibi bitego ariko biranga neza ku kazi gakomeye kakozwe n’umunyezamu. Umukino warangiye ari 2-0.

Indi mikino yahaye uyu munsi, APR FC yatsinze AS Muhanga 2-0, AS Kigali itsinda Marines 2-1, Musanze FC inganya na Espoir FC 1-1.

Imikino yabaye ku munsi w’ejo, Police FC yatsinze Heroes 3-1, Bugesera FC itsinda Etincelles 3-1 ni mu gihe na Kiyovu Sports yatsinze Gicumbi 3-1.

Vedaste agerageza gutera mu izamu ishoti ryavuyemo igitego

)