Nyuma y’ukwezi ari mu igeragezwa mu ikipe ya Rayon Sports, rutahizamu Drissa Dagnogo ukomoka mu gihugu cya Cote d’Ivoire, yamaze gusinya amasezerano y’imyaka 2.

Ni amasezerano yasinye mu gitondo cyo kuri uyu wa Kane, akaba yasinyishijwe na perezida w’iyi kipe Munyakazi Sadate, akaba agiye gusimbura Jules Ulimwengu wamaze gutandukana n’iyi kipe.

Yageze mu Rwanda mu mpera z’Ukwakira 2019, atangira imyitozo tariki ya 1 Ugushyingo, akaba yaranakinnye umukino wa gishuti Rayon Sports yatsinzemo Gasogi United ibitego 3-1 tariki ya 15 Ugushyingo. Uyu musore akaba nawe yaratsinzemo igitego.

Biteganyijwe ko azatangira gukinira Rayon Sports mu mikino yo kwishyura ya shampiyona, akaba ari muri Mutarama 2020 ubwo n’isoko rito ry’igura n’igurishwa mu Rwanda rizaba rifunguye.

Drissa Dagnogo, yakinnye muri Burkina Faso mu ikipe ya ASFA Yennenga kuva muri 2009, yayimazemo imyaka ibiri ahita ajya muri ASEC Mimosa yo muri Côte d’Ivoire, akina muri Africa Sports nayo yo muri Côte d’Ivoire, yanagiye i Dubai aho yavuye ajya muri Cyprus.

Umukino umwe yakiniye Rayon Sports yanayitsindiye igitego

)