Ibifashijwemo n’ikigo cy’itangazamakuru n’itumanaho cya Tele10, ikipe ya Rayon Sports igiye gutangiza televiziyo izajya ikorera kuri murandasi ’Internet’.

Ni bimwe mu bikubiye mu masezerano ikipe ya Rayon Sports yagiranye n’iki kigo, ni amasezerano yabaye tariki ya 24 Ukuboza 2019.

Mu masezerano yashyizweho umukono na perezida wa Rayon Sports, Munyakazi Sadate n’umuhuzabikorwa mukuru wa Tele 10 Group Sarah Ubben, arimo ko iki kigo kizubakira Rayon Sports televiziyo izajya ikorera kuri internet amasaha 24/24 kandi kikanatunganya amashusho azajya ayitambukaho imbona nkubone ’live’.

Rayon Sports TV, biteganyijwe ko izatangira gukora mu mpera za Mutarama 2020. Ifatabuguzi ryayo rizaba ari amafaranga 200 frw ku munsi, 800 frw mu cyumweru n’ 1500 frw ku kwezi. Tele 10 Group izakoresha urubuga rwayo rwitwa NGTV ruboneka kuri ngtv.rw no kuri Google Play Store ku buntu.

Umuhuzabikorwa mukuru wa Tele 10 Group Sarah Ubben na Munyakazi Sadate nyuma yo gusinya amasezerano y’ubufatanye

)