Mu mpera z’iki cyumweru ikipe ya Rayon Sports irakina umukino wa gishuti na Karisimbi FC yo mu gihugu cya DR Congo mu rwego rwo kwitegura imikino yo kwishyura izatangira mu mpera z’icyumweru gitaha.

Umukino wa Karisimbi FC na Rayon Sports uteganyijwe ku Cyumweru tariki ya 29 Ukuboza 2019, ukaba uzabera kuri Stade Regional i Nyamirambo saa 15:00’.

Ni umukino ikipe ya Rayon Sports yateguye mu rwego rwo kwitegura neza imikino yo kwishyura ya shampiyona umwaka w’imikino wa 2019-2020 aho iyi kipe izahera kuri Gasogi United tariki ya 5 Mutarama 2019.

Bizaba kandi ari no mu rwego rwo gufasha abakinnyi bashya iyi kipe yaguze kugira ngo bamenyerane n’abandi ku buryo shampiyona izajya gutangira barisanze mu ikipe.

Muri uyu mukino byitezwe ko hazahabwa umwanya abakinnyi bashya barimo rutahizamu Dagnogo wavuye muri Cote d’Ivoire uheruka no gutsinda igitego ku mukino wa Mukura VS, myugariro Kayumba Soter, umunyezamu wavuye mu Isonga, Adolphe ndetse na myugariro na we wavuye muri iri rerero, Axel.

Rayon Sports igiye gukina uyu mukino nyuma yo kunganya na Mukura VS mu mukino wa gishuti wabaye ku wa Kabiri igitego 1-1. Nta gihindutse kandi iyi kipe ya Rayon Sports izakina undi mukino wa gishuti mu cyumweru gitaha na Kiyovu Sports.

)