Mu mukino w’umunsi wa 16 wa shampiyona ya 2022-23 warimo guhangana gukomeye ariko na none uryoheye ijisho, Kiyovu Sports na Gasogi United zaguye miswi y’ubusa ku busa, ni nyuma y’uko nta kipe yabashije kureba mu izamu ry’indi.

Uyu mukino wabereye kuri Stade ya Bugesera wabanjirijwe n’uwo Police FC yatsinze Gorilla FC 3-2, Kiyovu Sports yawutangiye ubona ari yo irimo kubonana neza nubwo nta mahirwe afatika yaremye.

Ku munota wa 7, Hakizimana Abdul Karim yahinduye umupira mwiza imbere y’izamu ariko rutahizamu wa Gasogi United ashyizeho ikirenge unyura hanze y’izamu.

Mu minota 15 ya mbere wabonaga umukino urimo wihuta, umupira uva ku izamu rimwe ujya ku rindi ariko nta mahirwe akomeye aya makipe arema.

Ku munota wa 18, Felicien Hakizimana yahannye ikosa maze Iradukunda Jean Bertrand ashyiraho umutwe ariko umupira uruhukira mu ntoki z’umunyezamu Cuzuzo Aime Gael.

Umunyezamu Nzeyurwanda Djihad yarokoye ikipe ye ku munota wa 24 akuramo ishoti rikomeye yatewe na Max Well Djoumekou Ravel inyuma y’urubuga rw’amahina.

Ssekisambu Erissa yahushije igitego kidahushwa ku munota wa 35 nyuma y’uko Canavalo yahinduye umupira mwiza imbere y’izamu, ubwugarizi bwa Gasogi United bukawuhusha akisanga asigaranye n’izamu n’umunyezamu ariko umupira akawutera hanze y’izamu.

Rutahizamu wa Gasogi United, Max Well Djoumekou Ravel ku munota wa 39 yacomekewe umupira mwiza yisanga arebana n’umunyezamu Nzeyurwanda Djihad, amurobye ahita awohereza muri koruneri. Amakipe yombi yagiye kuruhuka ari 0-0.

Nyuma yo guhererekanya neza hagati ya Muhozi Fred na Bertrand, Bertrand yahise amucomerekera umupira mwiza ariko Muhozi ateye unyura hejuru y’izamu, hari ku munota wa 49.

Ku munota wa 55 Kiyovu Sports yateye koruneri maze bashyira mu izamu ariko umukinnyi wa Gasogi United awukuramo bisa n’aho ahagaze inyuma y’umurongo w’izamu ariko umusifuzi Salima avuga ko ntacyabaye.

Aya mahirwe yahise akurikirwa n’ayo ku munota wa 57 aho Ssekisambu yateye mu izamu ariko Cuzuzo akawukuramo.

Ku munota wa 62, Gasogi United yakoze impinduka za mbere, Simo Kayo yinjiye mu kibuga asimbura Blessing Goduin.

Ku munota wa 75, Bigirimana Abedi yahaye umwanya Benedata Janvier ku ku munota kandi wa 79 Coutinho yasimbuye Muhozi Fred ku ruhande rwa Kiyovu Sports. Ku munota wa 77, Ruhangazi Prosper yasimbuye Ishimwe Kevin.

Amakipe yombi yakomeje gushaka igitego ariko kirabura umukino urangira ari 0-0. Shampiyona izakomeza ejo no ku Cyumweru ndetse no ku wa Kabiri w’icyumweru gitaha.

Gahunda y’umunsi wa 16

Ku wa Gatanu, tariki ya 20 Mutarama 2023

Gorilla FC 2-3 Police FC (Stade Bugesera, 12:30)
Gasogi United 0-0 Kiyovu Sports (Stade Bugesera, 15:30)

Ku wa Gatandatu, tariki ya 21 Mutarama 2023

AS Kigali vs Marines FC (Stade Bugesera, 15:00)
Espoir FC vs Rwamagana City (Rusizi, 15:00)

Ku Cyumweru, tariki ya 22 Mutarama 2023

Rutsiro FC vs Etincelles FC (Stade Umuganda, 15:00)
Bugesera FC vs Sunrise FC (Stade Bugesera, 12:30)
APR FC vs Mukura VS (Stade Bugesera, 15:30)

Ku wa Kabiri tariki ya 24 Mutarama 2023

Rayon Sports vs Musanze FC (Stade Muhanga, 15:00)

Mugiraneza Frodauard agerageza kuzibira rutahizamu wa Gasogi United, Max Well Djoumekou

Nshimirimana Ismail Pitchou ku mupira

Muhozi Fred yagerageje biranga

Iradukunda Jean Bertrand yagize umukino mwiza cyane

)