Perezida w’ikipe ya Gasogi United, KNC avuga ko Mukura VS itabateye ubwoba kuko n’ubwo imaze igihe nta kintu kidasanzwe yakoze muri ruhago nyarwanda ko ahubwo bo biteguye kubigisha isomo rya ruhago.

Ibi uyu mugabo yabitangaje mu kiganiro n’itangazamakuru cyabaye ku munsi w’ejo kigaruka ku mukino wa shampiyona w’umunsi wa 20 bazakina na Mukura VS ku wa Gatandatu tariki ya 15 Gashyantare 2020.

Yavuze ko aho kubaho imyaka 1000 ameze nk’ikipe ya Mukura VS ahubwo yakora igikorwa cyiza kandi kigaragara ni yo byaba umunsi umwe gusa akazahora yibuka.

Yagize ati“Abayobozi, abatoza n’abakinnyi twese dufitiye abafana bacu ideni, tugomba gutsinda Mukura nta yandi mahitamo. Kuba Mukura imaze imyaka myinshi twe ntibidutera ubwoba, aho kuba urukwavu imyaka 1000 naba intare umunsi 1 maze nkazandikwa mu bitabo by’amateka."

Si ubwa mbere uyu mugabo atangaje amagambo nk’aya mbere y’umukino agiye gukina n’ikipe ariko bikarangira imutsinze dore ko mu mikino 19 amaze gukina yatsinze imikino 5 gusa, anganya 7 atsindwa 7.

Uyu mukino wa Gasogi United na Mukura VS uteganyijwe ku munsi wo ku wa Gatandatu tariki ya 15 Gashyantare, ukazabera kuri Stade Regional Nyimirambo saa 15:00’.

KNC ngo ntatewe ubwoba na Mukura VS

)