Nyuma yo kwegukana igikombe cya kabiri cya shampiyona adatsinzwe, umutoza wa APR FC, Mohammed Adil Erradi yashimiye buri umwe abona wagize uruhare kugira ngo amateka yanditse ayagereho, ku isonga hakaza ubuyobozi bwa APR FC.
Adil Erradi ukomoka muri Maroc, yinjiye muri APR FC mu mpeshyi ya 2019, ku mwaka we wa mbere mu Rwanda(2019-2020) yabashije kwegukana igikombe cya shampiyona adatsinzwe umukino n’umwe.
Ibi akaba yarabisubiriye muri uyu mwaka w’imikino wa 2020-2021 aho nabwo yakegukanye adatsinzwe.
Nyuma yo kwegukana iki gikombe, mu butumwa bwe yanyujije kuri Instagram akaba yashimiye ubuyobozi bw’iyi kipe buyitaho umunsi ku munsi, abakinnyi n’abatoza bafatanya.
Ati"ndashimira ubuyobozi bwa APR FC, abakinnyi, abafana, abatoza dufatanya, abaganga, itangazamakuru kuba twarakoranye neza nkagera kuri uyu musaruro mwiza mu mwaka w’imikino wa 2020-2021, ni igikombe cya kabiri kikurikiranya nta ntsinzwi."
Mu myaka 2 amaze muri shampiyona yatoje imikino 36 aho yose nta n’umwe yigeze atakazamo ari nabyo byamuhesheje kwegukana igikombe adatsinzwe.
Ibitekerezo