Umunyana Shanitah uhagarariye u Rwanda mu irushanwa ry’ubwiza rya Miss Supranational 2019 ntari ku rutonde rwa nyuma rw’abakobwa 25 bahabwa amahirwe yo kwegukana ikamba ry’iri rushanwa.

Ikinyamakuru ‘Missosology’ gisanzwe gikora ubusesenguzi ku marushanwa y’ubwiza atandukanye, by’umwihariko kigakurikirana Miss Supranational, cyagaragaje urutonde rwa nyuma rw’abakobwa 25 bahabwa amahirwe yo kwegukana iri kamba rya 2019.

Ni urutonde rukozwe ku nshuro ya kane aho Umunyana Shanitah yagaragayeho inshuro ebyiri gusa ndetse ku rutonde rw’ubushize yari ku mwanya wa 5 ku bakobwa bashobora kwegukana iri kamba.

Abakobwa batanu ba mbere kuri uru rutonde rwagaragajwe kuri uyu wa 6 Ukuboza 2019 ruyobowe n’uhagarariye Namibia witwa Yana Haenisch, agakurikirwa n’Umunya-Thailand witwa Anntonia Porsild, uwa gatatu ni Janick Maceta wo muri Peru, hakaza Ngoc Chau wo muri Vietnam na Leyla Van Greuning wo muri Afurika y’Epfo.

Uwo muri Venezuela witwa Gabriela De la cruz wari ku mwanya wa mbere ku rutonde rw’ubushize yaje ku mwanya wa 11.

Ntibitunguranye kuba Shanitah atari kuri uru rutonde rwa nyuma rw’abahabwa amahirwe yo kwegukana ikamba kuko nta cyiciro na kimwe yitwayemo neza nubwo yaje mu bakobwa 16 bahabwa amahirwe yo kwegukana ikamba rya Miss Supranational Influencer muri iri rushanwa.

Irushanwa rya Miss Supranational 2019 rimaze iminsi ribera mu gihugu cya Poland, biteganyijwe ko uwegukana ikamba agasimbura Valeria Vazquez (Umunya-Puerto Rico waryegukanye umwaka ushize) amenyekana mu birori byo gusoza iri rushanwa biba none kuri uyu wa Gatanu tariki ya 6 Ukuboza 2019 mu Mujyi wa Silesia guhera saa mbili z’ijoro zo muri kiriya gihugu.

Urutonde rw'abahabwa amahirwe yo kwegukana ikamba rya Miss Supranational 2019

Shanitah ntari ku rutonde rw'abahabwa amahirwe yo kwegukana Miss Supranational 2019

)