Minisiteri y’Urubyiruko n’Umuco, yafashe umwanzuro wo guhagarika irushanwa rya Miss Rwanda mu gihe iperereza rigikomeje kuri Ishimwe Dieudonne umuyobozi wa Rwanda Inspiration Backup iritegura ku byaha akurikiranyweho birimo ihohoterwa rishingiye ku gitsina yakoreye abakobwa baryitabiriye mu bihe bitandukanye.

Tariki ya 25 Mata 2022 nibwo Ishimwe Dieudonné [Prince Kidi] uyobora Rwanda Inspiration Backup itegura Miss Rwanda yatawe muri yombi akurikiranyweho ibyaha bifitanye isano n’ihohoterwa rishingiye ku gitsina yakoreye abakobwa bitabiriye iri rushanwa mu bihe bitandukanye.

Mu gihe iperereza kuri ibi byaba bigikomeje, Minisiteri y’Urubiruko n’Umuco, yasohoye itangazo rivuga ko ibikorwa byose bya ‘Miss Rwanda’ bibaye bihagaritswe.

Yagize iti “Hashingiwe ku iperereza ririmo gukorwa n’Urwego rw’Igihugu rushinzwe ubugenzacyaha (RIB), ku muyobozi wa “Rwanda Inspiration BackUp”, ukekwaho ibyaha bifitanye isano n’ihohoterwa rishingiye ku gitsina yakoreye abakobwa bitabiriye irushanwa rya “Miss Rwanda” mu bihe bitandukanye, Minisiteri y’Urubyiruko n’Umuco iramenyesha Abanyarwanda ko ibaye ihagaritse iri rushanwa mu gihe iperereza ritararangira.”

Ibi bikorwa by’iri rushanwa bikaba bihagaritswe nyuma y’amasaha make hamenyekanye inkuru y’itabwa muri yombi rya Miss Iradukunda Elsa (Miss Rwanda 2017) aho akurikiranyweho gukoresha impapuro mpimbano no kubangamira iperereza.

Prince Kid watangiye gutegura iri rushanwa muri 2014, RIB mu cyumweru gishize yashyikirije dosiye ye Ubushinjacyaha aho akurikiranyweho gukoresha undi imibonano mpuzabitsina ku gahato, gusaba cyangwa gukora ishimishamubiri rishingiye ku gitsina no guhoza undi ku nkeke bifitanye isano n’imibonano mpuzabitsina.

Minisiteri y’Urubyiruko n’Umuco iramenyesha Abanyarwanda ko ibaye ihagaritse iri rushanwa mu gihe iperereza ritararangira.

— Ministry of Youth and Culture | Rwanda (@YouthCultureRW) May 9, 2022

Miss Rwanda yahagaritswe by'agateganyo

)