Urupfu ntirwigeze rucogoza ubukungu bwa Michael Jackson cyangwa ibindi byamamare byasize byanditse amateka bigaca n’uduhigo dutandukanye ku Isi.

Uyu muririmbyi wabaye icyamamare mu njyana ya Pop ni we uyoboye abapfuye binjije akayabo muri uyu mwaka ugana ku musozo wa 2018 aho ibikorwa bye byabashije kugeza ku nyungu ya miliyoni $400 abikesha by’umwihariko umugabane we mu kigo cya EMI Music Publishing kiri mu bya Sony.

Forbes yasohoye urutonde rw’abapfuye binjije amafaranga menshi yavuze ko andi yayasaruye muri Mijac Music, amasezerano mashya akubiyemo imishinga nk’amashusho ya Michael Jackson’s Halloween yanyujijwe kuri CBS ku wa 20 Ukwakira, mu mwaka wa kabiri yikurikiranya.

John Branca uri mu bacunga imitungo ya nyakwigendera yagize ati "Mubona Charlie Brown Christmas cyangwa Charlie Brown Thanksgiving buri mwaka, ubu natwe turi kureba uko twashyiraho Michael Jackson’s Halloween buri mwaka. Twizeye ko bizaduhiraho bigahoraho."

Michael Jackson wakoze umuziki wigaruriye abakunzi benshi mu Isi nzima yanikiriye abandi kuko, inyuma ye haboneka ibindi byamamare nka Elvis Presley, uri ku mwanya wa kabiri n’akayabo ka miliyoni $40, Arnold Palmer ku mwanya wa gatatu na miliyoni $35.

Amafaranga yinjijwe n’ibyamamare icumi bitakiriho mu 2018 agera kuri miliyoni $628 byatumye ahita yikuba kabiri ugereranyije n’ayo mu mwaka ushize kuko icyo gihe yari miliyoni $312.

Akayabo Michael Jackson yinjije muri uyu mwaka katumye umutungo we mushya ugera kuri miliyari $2.4 kuva mu myaka icumi yitabye Imana.

Urutonde rw’abapfuye binjije akayabo mu 2018

1. Michael Jackson: Yinjije miliyoni $400
2. Elvis Presley: Yinjije miliyoni $40
3. Arnold Palmer: Yinjije miliyoni $35
4. Charles Schulz: Yinjije miliyoni $34
5. Bob Marley: Yinjije miliyoni $23
6. Dr. Seuss: Yinjije miliyoni $16
7. Hugh Hefner: Yinjije miliyoni $15
8. Marilyn Monroe: Yinjije miliyoni $14
9. Prince: Yinjije miliyoni $13
10. John Lennon: Yinjije miliyoni $12
11. XXXTentacion: Yinjije miliyoni $11
12. Muhammad Ali: Yinjije miliyoni $8
13. Bettie Page: Yinjije miliyoni $7

)