Umunyarwanda Ngabo Medard uzwi ku izina ry’ubuhanzi rya Meddy, usigaye ukorera umuziki muri Leta Zunze Ubumwe za Amerika, yashyizwe ku rutonde rw’abahanzi bazaririmba mu bitaramo bya Wasafi Festival 2019 bitegurwa na ‘WCB Wasafi Records’ y’umuhanzi Diamond Platnumz.

Nk’uko bigaragara ku rukuta rwa Instagram rwa televiziyo ya Diamond yitwa Wasafi Tv, kuri uyu wa 5 Ugushyingo 2019 bagize bati: “Umuhanzi w’Umunyarwanda wakunzwe mu ndirimbo ‘Slowly’ no mu njyana ya RnB, Meddy azaririmba mu gitaramo cya ‘Wasafi Festival 2019’.

Iki gitaramo cya Wasafi Festival 2019 kizaba ku wa 9 Ugushyingo 2019 ku kibuga cya Kijitonyama mu Mujyi wa Dar es Salaam. 20% y’amafaranga azava muri ibi bitaramo azatangwa mu bikorwa byo kuvuza abana bafite ikibazo cy’umutima babarizwa mu kigo Jakaya Kikwete Cardiac Institution nk’uko byakomeje gutangazwa na Diamond ukuriye Wasafi.

Mu kiganiro yagiranye na Wasafi TV, Diamond yemeje ko iki gitaramo kizaba kiri ku rwego rwo hejuru kuko kizagaragaramo abahanzi bakomeye barimo Umunya-Nigeria Ayodeji Ibrahim Balogum uzwi mu muziki ku izina rya Wizkid.

Umuhanzi Harmonize uherutse gutandukana na Wasafi angashinga inzu ye ifasha abahanzi izwi nka Konde Worldwide Music, yari yatumiwe muri iki gitaramo cya Wasafi Festival 2019, ntazaboneka kubera ko azaba afite ikindi gitaramo agomba kwitabira.

Ali Kiba na we wagombaga kuririmba muri iki gitaramo, yatangaje ko atamenyeshwejwe mbere kandi ko atiteguye. Abandi bahanzi bazaririmba ni Ruby, Country Boy, Tiwa Savage, Young Killer, Dulla Makabila, DJ Ommy Crazy, Lava Lava, Mboso, Queen Darleen n’abandi.

Wasafi Festival ni ibitaramo ngarukamwaka byatangijwe mu mwaka wa 2018 bibera mu Mujyi wa Mambosa, Nairobi n’ahandi.

Ari ku rutonde rw’abazaririmba

)