Imyiteguro irarimbanyije kuri Miss Umunyana Shanitah uzahagararira u Rwanda muri Miss Supranation 2019
Nyampinga Umunyana Shanitah uzahagararaira u Rwanda mu irushanwa ry’ubwiza rya Miss Supranational 2019 rizabera mu gihugu cya Poland guhera ku wa 6 Ukuboza 2019, ageze kure imyiteguro yo kuzaryitabira.
Nubwo u Rwanda ruzaba rwitabiriye iri rushanwa ku nshuro ya munani, ubusanzwe muri uyu mwaka rizaba riba ku nshuro ya 11, ribere mu Ntara ya Silesia.
Ku wa 8 Nzeri 2019 ni bwo Umunyana Shanitah yegukanye ikamba rya Miss Supranational Rwanda 2019.
Uretse iri Kamba yegukanye, asanzwe afite ikamba ry’Igisonga cya Mbere cya Miss Rwanda 2018 yanaserukiye u Rwanda mu irushanwa rya Miss University Africa 2018 yatwayemo ibikombe bitatu.
Shanitah amaze iminsi mu myiteguro ikubiye mu byiciro bitatu kongeraho n’icyiciro gishya cy’irushanwa aho abakobwa bose batangiye guhatanira ikamba rya ‘Miss Influencer’ bifashishije ‘instagram stories’.
Iki cyiciro gishya kirimo ‘challenges’ enye (4) basabwa gukora inkuru zitandukanye banyuza kuri instagram. Umukobwa uzitwara neza muri iki cyiciro ‘Instagram Stories Challenges’ azahita abona amahirwe yo kwinjira muri 25 bazavamo Miss Supranational 2019.
Amakuru agera ku Isimbi avuga ko mu kwezi gushize uyu mukobwa yagiye mu gihugu cya Tanzaniya gushaka Visa izamufasha kugera muri Poland.
Mu kwitegura iri rushanwa, Shanitah akora ibijyanye no kubaka umubiri aho akora imyitozo ngororamubiri (fitness) buri munsi ajya muri gym, yitoza gutambuka ndetse no kwifotoza kuko intambuko y’abakobwa mu marushanwa mpuzamahanga itandukanye cyane n’uko baba batambuka mu marushanwa ya hano imbere mu gihugu.
Ibindi yitoje ni ugutambuka mu byiciro no mu myambaro itandukanye abifashishijwemo na Miss Kubwimana Simbi Sabrina.
Uretse ibyo kandi yakoze imyiteguro ijyanye n’imivugire ndetse no kwigirira icyizere, abifashijwemo na Mucyo Christelle wari mu Kanama Nkemurampaka kemeje Miss Supranational Rwanda 2019.
Abakobwa bazitabira iri rushanwa ryegukanywe n’ umunya-Puerto, Rico Valeria Vazquez mu mwaka ushize, bazaturuka mu bihugu 80 byo migabane y’isi itandukanye ndetse rikazanyuzwa kuri televiziyo zo mu bihugu birenga 140, imbona nkubone.
Ibitekerezo