Isoko ry’abakinnyi ba ruhago hirya no hino ku Isi ryafunguye, Kylian Mbappe uheruka kongera amasezerano muri Paris Saint Germain ni we mukinnyi ubu ufite agaciro ko hejuru kurusha abandi.

Nyuma y’amezi menshi bivugwa ko azerekeza muri Real Madrid, Kylian Mbappe w’imyaka 23 yaje kongera amasezerano muri PSG azageza 2025.

Mu busesenguzi bwakoze na CIES Football bwagaragaje abakinnyi ubu bafite agaciro kari hejuru y’abandi muri iyi mpeshyi ya 2022, bakaba baragendeye uko bitwara, imyaka, amasezerano bafitanye n’amakipe yabo n’ibindi.

Kylian Mbappé ni we wa mbere ni mu gihe Vinícius Júnior wafashije Real Madrid kwegukana Champions League ni we uri ku mwanya wa 2.

Urutonde rw’abakinnyi 10 bafite agaciro kurusha abandi muri iyi mpeshyi

1. Kylian Mbappé: €205.6m (£175.7m)

Uyu rutahizamu w’umufaransa ukinira Paris Saint Germain, afite imyaka 23 uru rutonde rwamushyize ku mwanya wa mbere aho yahawe agaciro ka miliyoni 205.6 z’amayero zikaba miliyoni 175.7 z’amapawundi.

2. Vinícius Júnior: €185.3m (£158.3m)

Ni rutahizamu ufite impano itangaje ukomoka muri Brazil w’imyaka 21 ukinira Real Madrid aho yafashije ikipe ye kwegukana Champions League 2022 batsinze Liverpool, afite agaciro ka miliyoni 185.3 z’amayero bivuze miliyoni 158.3 z’amapawundi.

3. Erling Haaland: €152.6m (£130.4m)

Haaland ukomoka muri Norway w’imyaka 21 yamaze gusinyira Manchester City avuye muri Dortmund, nyuma yo gusinyira iyi kipe bivugwa ko ubu afite agaciro ka miliyoni 152.6 z’amayero zikaba miliyoni 130.4 z’amapawundi.

4. Pedri: €135.1m (£115.4m)

Pedro González López ukina mu kibuga hagati muri FC Barcelona na Spain, uyu musore w’imyaka 19 afite agaciro ka miliyoni 135.1 z’amayero, ni ukuvuga miliyoni 115.4 z’amapawundi.

5. Jude Bellingham: €133.7m (£114.2m)

Jude Bellingham, 18, ni we mukinnyi ukiri muto waje kuri uru rutonde rw’abakinnyi 10, uyu mwana usanzwe ukinira Dortmund aho akomoka mu Bwongereza, afite agaciro ka miliyoni 133.7 z’amayero ni ukuvuga miliyoni 114.2 z’amapawundi.

6. Phil Foden: €124m (£105.9m)

Phil Foden rutahizamu w’umwongereza ukinira Manchester City. Uyu musore w’imyaka 22 yatwaranye n’u Bwongereza igikombe cy’abatarengeje imya 17 cya 2017 cyabereye mu Bwongereza, yahawe agaciro ka miliyoni 124 z’amayero, ni miliyoni 105.9 z’amapawundi.

7. Frenkie de Jong: €112.5m (£96.1m)

Ni umuholandi winjiye muri FC Barcelona 2019 avuye muri Ajax y’iwabo, yahawe agaciro ka miliyoni 112.5 z’amayero ni miliyoni 96.1 z’amapawundi.

8. Luis Díaz: €110m (£94m)

Luis Diaz ni umunya-Colombia ukinira Liverpool mu Bwongereza, yahawe agaciro ka miliyoni 110 z’amayero bivuze ko ari miliyoni 94 z’amapawundi.

9. Rúben Dias: €109.6m (£93.6m)

Ni myugariro wa Portugal ukinira Manchester City aho yayigezemo muri 2020 avuye muri Benefica. Uyu mukinnyi ubu afite agaciro ka miliyoni 109.6 z’amayero bivuze ko ari miliyoni 93.6 z’amapawundi.

10. Ferran Torres: €109.5m (£93.5m)

Uyu musore w’imyaka 22 ukinira FC Barcelona ukomoka muri Spain, ni we uri ku mwanya wa 10 kuri uru rutonde aho afite agaciro ka miliyoni 109.5 z’amayero bivuze ko ari miliyoni 93.5 z’amapawundi.

)