Umusifuzi wakubise mu bugabo umukinnyi wa Mukura VS yahagaritswe umwaka na FERWAFA
Ishyirahamwe ry’Umupira w’Amaguru mu Rwanda binyuze muri Komisiyo Ishinzwe Imisifurire, ryahagaritse umwaka wose, Nsengiyumva Jean Paul wakubise mu bugabo umukinnyi wa Mukura VS, Mbonyamahoro Serieux.
Ibi byabaye ku Cyumweru tariki ya 3 Gicurasi 2026 mu mukino w’umunsi wa 29 wa Shampiyona y’icyiciro cya mbere mu Rwanda umwaka w’imikino wa 2025-26 wahuje Mukura VS na Rutsiro FC kuri Kamena.
Muri uyu mukino hagaragayemo imyitwarire idasanzwe y’umusifuzi wa kabiri w’igitambaro, Nsengiyumva Jean Paul aho yasifuye penaliti ya Rutsiro FC maze Serieux ajya kumubaza ikosa ribaye, ubona yashyize amaboko inyuma undi ahita amukubita umugeri mu bugabo bimuviramo kujya kwa muganga.
Nk’aho bidahagaije, umusifuzi wo hagati Nshimiyimana Rémy Victor yahise aha Serieux ikarita itukura.
Mukura Victory Sports ikaba yari yatanze ikirego kuri iki kibazo kongeraho imisifurire itaragenze neza, penaliti batanze batemera uko ari 2 nubwo imwe yavuyemo, abakinnyi bayo bahawe amakarita n’umutoza Nshimiyimana Canisius basaba ko zivanwaho. Umukino warangiye Rutsiro FC ibatsinze 2-1.
Nyuma y’uko Komisiyo ishinzwe Imisifurire muri FERWAFA itaranye ejo hashize ku wa Mbere, kuri uyu wa Kabiri FERWAFA yasohoye itangazo rihana aba basifuzi.
Iri tangazo rigira riti "Komisiyo Ishinzwe Imisifurire yateranye ku wa 04/05/2026 isuzuma imikino yo ku munsi wa 29 wa BK Pro-League, by’umwihariko umukino wabereye i Huye wahuje Mukura VS&L na Rutsiro FC, ku wa 03/05/2026."
"Igendeye ku itegeko rigenga imyitwarire y’abasifuzi mu Rwanda (règlement du statut d’arbitrage 2026), Raporo ya Komiséri n’amashusho y’umukino, komisiyo yafashe imyanzuro ikurikira:"
"Bwana Nshimiyimana Rémy Victor (umusifuzi wo hagati), Komisiyo yagaye imiyoborere y’umukino (insuffisance de la performance générale) ahanishwa guhagarikwa imikino 5."
Iri tangazo ryakomeje rigira riti "Bwana Nsengiyumva Jean Paul (umusifuzi wo ku ruhande wa 2), yagaragaje imyitwarire idahuye n’inshingano ahanishwa guhagarikwa amezi 12. Icyemezo cya tekiniki kitari cyo cyangize ingaruka uko umukino warangiye, ahanishwa guhagarikwa imikino 5."
Amakuru avuga ko Mukura VS yari yafashe umwanzuro wo kudakina umukino bafitanye na Police FC ejo mu gihe hadafashwe umwanzuro kuri iki kibazo kandi abakinnyi babo bahanwe bagakurirwaho ibihano.
Ibitekerezo
Mpagazahayo Emmanuel
Ku wa 5-05-2026Uwo musifuzi ibyo yakoze sibyo arikose abakinnyi nabo bisubireho ubwuzingo yaragiye kumubaza ikosa ribaye sirimwe sikabiri tubona abasifuzi bakubitwa nabakinnyi bakabirukankana mukibuga ugirango yamukubise Atari kureba uburakari azanye ubundise umukinnyi yajyaga kubaza ikosa ribaye numuvugizi koko ubwo byajye barajya bakubitwa nibatareka kujya bakubitwa abasifuzi bijyabiba