Urwego rugenzura umuziki muri Tanzania [BASATA] rwashinje Diamond na Rayvanny gusuzugura ubuyobozi rubategeka kutongera gukora ibitaramo imbere mu gihugu no hanze.

Aba bahanzi bombi basanzwe babarizwa muri Wasafi Records barashinjwa kuririmba nkana indirimbo bakoranye yitwa ’Mwanza’ mu iserukiramuco bamaze iminsi bakora nubwo iyi yaciwe kubera amagambo yogeza ubusambanyi arimo.

Mu itangazo ryasohowe n’uru rwego rifite umukono wa Onesmo Kayanda riragira riti "Iyi nama yanzuye ko tugiye guhagarika Diamond na Rayvanny ku gukora ibitaramo haba imbere mu gihugu no hanze ya Tanzania bitewe no gusuzugura no kubahuka BASATA. Aba bateguye Wasafi Festival bakoresheje ibishoboka byose ngo basuzugure iyi nama."

Umuyobozi w’uru rwego, Kayanda yabwiye Bongo5 ko "BASATA ni urwego rugengwa na leta, urusuzuguye nta yandi mahitamo aba arusigiye uretse kumuhana nk’abakora ubugambanyi ku gihugu. Ubushinjacyaha buzakurikirana iki kirego."

Umujyanama wa Diamond, Babu Tale, we yabwiye ikinyamakuru Edaily ko ibitaramo by’abahanzi be bizakomeza gukorwa nk’uko byateguwe kandi bakazagerageza kuganira na BASATA kugeza bagiranye amasezerano ngo ibibazo bikemuke.

Yagize ati "Ibitaramo bizakomeza kuba nk’uko biteguwe, byose nsobanuye neza. Tuzareba uko twabegera turebe uko twabiganiraho. Mu gihe bitarakorwa tuzabikora [ibitaramo] twirengere ingaruka nibagera aho byabereye."

Diamond amaze iminsi arebana ay’ingwe n’inzego zireberera umuco muri Tanzania kubera amagambo y’ibishegu n’amashusho y’abakobwa bambaye ubusa ashyira mu ndirimbo ze.

Diamond na Rayvanny bategetswe guhagarika gukora ibitaramo

Muri iyi ndirimbo yitwa "Mwanza" yatumye, Diamond na Rayvanny bategekwa guhagarika ibitaramo byabo, aririmbye Intara ya Mwanza ndetse amashusho yayo baba bavuga agace kitwa ‘Nyegezi’ ari nano bararirimba ngo Nyege, NYEGE-zi, ari nayo magambo ahanini yazamuye uburakari mu nzego za leta.

Ubusanzwe Nyege, ni ijambo ry’Igiswahili rikoreshwa cyane muri Tanzania rigasobanura ‘ubushake umugabo agira akifuza gukora imibonano mpuzabitsina.

Muri iyi ndirimbo, Diamond abiririmba kenshi ndetse agasubiramo iri jambo mu buryo bwumvikanisha ko ibyo avuga bitandukanye no gutaka Akarere ka Nyegezi ko muri Mwanza.

Diamond na Rayvanny bamaze iminsi bamaganirwa kure kubera indirimbo 'Mwanza'

Indirimbo aba basore bise "Mwanza" ishinjwa kubamo urukozasoni mu mvugo

)