Binyuze mu Ishuri ry’Inshuke Ecole Maternelle Fondation Ndayisaba Fabrice ku bufatanye n’Akarere ka Nyabihu, amashuri arenga 115 yo muri Nyabihu yahuriye mu gikorwa ngaruka mwaka cyo Kwibuka Abana n’Impinja bazize Jenoside yakorewe Abatutsi 1994.

Iki gikorwa kikaba cyaratangiye ejo hashize tariki ya 18 Gicurasi 2026 aho kigomba kumara icyumweru (iminsi 5), akaba ari inshuro ya gatatu kibaye mu Karere ka Nyabihu.

Cyitabiriwe n’abanyeshuri bo mu mashuri y’inshuke, abanza, ayisumbuye n’ay’imyuga n’ubumenyingiro, hamwe n’abarezi babo. Hanagaragayemo uruhare rwa Komite Nyobozi y’Akarere, Komite ya IBUKA ku rwego rw’Akarere n’Imirenge, Abanyamabanga Nshingwabikorwa b’Imirenge, ndetse n’Abagenzuzi b’Uburezi.

Ndayisaba Fabrice umuyobozi w’iri shuri ry’incuke ryateguye iki gikorwa, yavuze ko iki gikorwa cyari kigamije gutoza abana n’urubyiruko umuco wo kwibuka Jenoside yakorewe Abatutsi, kubarinda ingengabitekerezo yayo no kubashishikariza gukura bafite indangagaciro z’ubumuntu, urukundo rw’igihugu n’ubwiyunge.

By’umwihariko, kwibuka abana n’impinja bazize Jenoside yakorewe Abatutsi, byakozwe mu buryo bujyanye n’imyaka y’abanyeshuri binyuze mu mikino, imyidagaduro n’ubutumwa butandukanye.

Yasabye inzego za Leta, iz’abikorera n’imiryango itari iya Leta gushyigikira gahunda yo kwibuka abana n’impinja bazize Jenoside ku rwego rw’igihugu hose, ku buryo byajya bikorwa buri mwaka mu mashuri yose.

Mu gutangiza iki gikorwa, umuyobozi w’Akarere ka Nyabihu wungirije ushinzwe imibereho myiza y’abaturage, Simpenzwe Pascal yavuze ko umwana kumwereka inzira nziza akiri muto bimufasha kutayoba.

Ati “Icyo nemera ni uko kwereka umwana inzira nziza akiri muto bimufasha kutayoba, kudahuzagarika mu buzima bwe bwose. Turi guhangana n’ingaruka za Jenoside harimo ihakana n’ipfobya rya Jenoside yakorewe Abatutsi kandi abana bacu bagomba kumenya ukuri kw’amateka yacu bagakura bazi urugamba rubategereje.”

Abanyeshuri basobanukiwe akamaro ko Kwibuka, gahunda ya “Ndi Umunyarwanda”, n’indangagaciro z’ubumwe n’ubudaheranwa nk’inkingi y’iterambere ry’igihugu.

Hatanzwe ubutumwa bwo guhumuriza abarokotse Jenoside, by’umwihariko ababyeyi babuze abana babo ndetse n’abana babuze ababyeyi; basabwa gukomera no gukomeza kwizera ko igihugu kibari hafi kandi kibakunda.

Hatanzwe kandi ubutumwa bw’ibanze ku kwibuka, gukomeza abarokotse no kubaka u Rwanda rw’ejo rwubakiye ku kuri, ubumwe n’ubworoherane. Bati “Rwanda impore, komera, abana bawe ntituzatuma usubira mu mwijima ukundi.”

Ndayisaba Fabrice wateguye iki gikorwa cyo kwibuka abana n'impinja

Amashuri atandukanye yo mu Karere ka Nyabihu yibutse abana n'impinja bazize Jenoside yakorewe Abatutsi mu 1994

)