Mu gusoza igikorwa cyo Kwibuka Abana n’Impinja bazize Jenoside yakorewe Abatutsi mu 1994 cyabereye mu mashuri agize Akarere ka Nyabihu, Umuyobozi w’aka Karere, Mukandayisenga Antoinette yashimiye Ndayisaba Fabrice wateguye iki gikorwa ku bwitange n’umutima yagaragaje wo gukunda igihugu.

Kuva tariki ya 18 kugeza 22 Gicurasi 2026, mu mashuri arenga 155 yo mu Karere ka Nyabihu habaye igikorwa cyo Kwibuka abana n’ibibondo bishwe muri Jenoside yakorewe Abatutsi mu 1994.

Iki gikorwa ngaruka mwaka kikaba cyarabaga ku nshuro ya gatatu, cyateguwe binyuze mu Ishuri ry’Inshuke Ecole Maternelle Fondation Ndayisaba Fabrice ku bufatanye n’Akarere ka Nyabihu.

Cyitabiriwe n’abanyeshuri bo mu mashuri y’inshuke, abanza, ayisumbuye n’ay’imyuga n’ubumenyingiro, hamwe n’abarezi babo. Hanagaragayemo uruhare rwa Komite Nyobozi y’Akarere, Komite ya Ibuka ku rwego rw’Akarere n’Imirenge.

Ndayisaba Fabrice Umuyobozi w’iri shuri ry’incuke akaba yashimiye bikomeye Nyakubahwa Perezida wa Repubulika y’u Rwanda, Paul Kagame ku bwo guteza imbere igihugu n’abanyarwanda.

Ati "Ndashimira Nyakubahwa Perezida Paul Kagame uruhare rwe mu guteza imbere u Rwanda n’Abanyarwanda, ndashimira Ingabo z’igihugu, Police y’igihugu, RIB, Ibuka, Miniubumwe, Minisiteri y’uburezi, uruhare rwabo rukomeye bagira mu gukomeza kurwanya ingengabitekerezo ya Jenoside no kubaka ubumwe bw’abanyarwanda."

"Iyo ndebye aho iki gikorwa natangiye kigeze n’umusaruro cyatanze, bimpa icyizere ko aba bana bazakura bazi amateka y’igihugu kandi ibyabaye bitazongera ukundi. Nifuza ko Kwibuka abana n’impinja byazagera mu gihugu hose."

Ndayisaba Fabrice kandi yashimiye umubyeyi we, Gakwaya Jean Pierre uba muri Canada umufasha umunsi ku munsi yaba ibitekerezo, amafaranga kugira ngo iki gikorwa kigende neza.

Umuyobozi wa Ibuka wungirije mu Karere ka Nyabihu, Marie Chantal Uwera yavuze ko muri iki gikorwa cyamaze iminsi 5 hari byinshi urubyiruko rwo mu mashuri rwarushijeho kunguka.

Ati "Umuryango Ibuka urashimira cyane ubuyobozi bw’Akarere kacu ka Nyabihu, ibigo by’amashuri byo muri aka Karere bagize uruhare cyane kugira ngo iki gikorwa cyo kwibuka abana n’impinja cyigende neza, hari byinshi urubyiruko rwo mu mashuri rwarushijeho gusobanukirwa bijyanye n’amateka yaranze igihugu cyacu harimo no kwirinda ingengabitekerezo ya Jenoside yakorewe Abatutsi 1994."

"Abana bacu n’urubyiruko bamaze gufata umurongo mwiza w’uburyo bakomeza gusigasira U Rwanda rwacu. Turashima Ecole Maternelle Fondation Ndayisaba Fabrice uburyo yitanze ngo iki gikorwa cyongere kibe mu Karere kacu, turifuza ko cyazakomeza kikajya kiba ngaruka mwaka ndetse kizagere n’ahandi hose mu gihugu."

Umuyobozi w’Akarere ka Nyabihu, Mukandayisenga Antoinette yashimiye Ndayisaba Fabrice wateguye iki gikorwa n’uburyo yitanga mu gufasha abana kumenya amateka ya Jenoside yakorewe Abatutsi mu 1994.

Ati "Ndayisaba Fabrice,
warakoze cyane ku mutima wo gukunda igihugu no kwitanga binyuze mu gufasha abana kumenya amateka ya Jenoside yakorewe Abatutsi mu 1994 mu gihugu cyacu, komera kandi turi kumwe, Ibuka kandi namwe murakoze cyane gushima Ndayisaba Fabrice wateguye iki gikorwa, mu izina rya Ibuka natwe turabashimira cyane, mu bufatanye buturanga mu mitegurire n’imigendekere myiza y’ibikorwa byo Kwibuka mu Karere kacu."

Abanyeshuri basobanukiwe akamaro ko Kwibuka, gahunda ya “Ndi Umunyarwanda”, n’indangagaciro z’ubumwe n’ubudaheranwa nk’inkingi y’iterambere ry’igihugu.

Hatanzwe ubutumwa bwo guhumuriza abarokotse Jenoside, by’umwihariko ababyeyi babuze abana babo ndetse n’abana babuze ababyeyi; basabwa gukomera no gukomeza kwizera ko igihugu kibari hafi kandi kibakunda.

Hatanzwe kandi ubutumwa bw’ibanze ku kwibuka, gukomeza abarokotse no kubaka u Rwanda rw’ejo rwubakiye ku kuri, ubumwe n’ubworoherane. Bati “Rwanda impore, komera, abana bawe ntituzatuma usubira mu mwijima ukundi.”

Amashuri arenga 155 muri Nyabihu amaze icyumweru yibuka abana n’impinja bazize Jenoside yakorewe Abatutsi mu 1994

Ndayisaba Fabrice wateguye iki gikorwa

Umuyobozi w'Akarere ka Nyabihu, Mukandayisenga Antoinette (ibumomoso) n'Umuyobozi wungirije wa Ibuka muri aka Karere, Marie Chantal Uwera (iburyo) bashimiye Ndayisaba Fabrice

)