Umuririmbyi umaze gushinga imizi mu ndirimbo zo kuramya no guhimbaza Imana, Bizimana Patient, agiye kwitabira igiterane gikomeye yatumiwemo n’Itorero rya Zeraphath Holy Church ry’i Rubavu ku ivuko ry’uyu muhanzi.

Iki giterane Patient Bizimana yatumiwemo kizamara ibyumweru bibiri kiba, kizatangirira ku ishami ry’iri torero i Nyamirambo mu Mujyi wa Kigali kuva ku wa 21 kugeza ku wa 25 Ugushyingo, hanyuma gikomereze mu Karere ka Rubavu ahari icyicaro gikuru cyaryo kuva ku wa 28 Ugushyingo kugeza ku wa 2 Ukuboza 2018.

Itorero rya Zeraphat Holy Church ryatumiye Patient Bizimana riyobowe na Bishop Harerimana Jean Bosco umaze kumenywa mu gusengera abafite ibibazo by’uburwayi bukomeye yaba ubusanzwe ndetse akaba n’umunyabitangaza mu guhagurutsa ababana n’ubumuga bwo kutagenda, guhumura abatabona no gusengera indwara z’imyuka biri mu mpamvu z’ingenzi zatumye itorero ashumbye ritegura iki giterane.

Abazitabira iki giterane mu kwifatanya gushima Imana bazanataramirwa n’abahanzi bakomeye barimo Patient Bizimana uzaboneka muri ibi biterane byombi i Kigali n’i Rubavu, Healing Worship Team izaboneka mu giterane cy’i Kigali hamwe na Fire Team n’andi makorali akorera umurimo w’Imana muri uru rusengero rwa Zeraphath Holy Church mu gihugu.

Iki giterane gifite insanganyamatsiko yakomowe mu gitabo cy’Abefeso 5:20-21igira iti “Mujye mushima Imana Data wa twese ku bw’ibintu byose, mubishimire mu izina ry’Umwami wacu Yesu Kristo, kandi mugandukirane ku bwo kubaha Kristo).

Iri torero ryanatumiye Bishop Mathias Rubona uzaturuka muri Kenya.

Igiterane ku minsi yose kizajya gitangira kuva ku isaha ya saa cyane z’igicamunsi kugera saa moya z’ijoro (15h00-19h00).

Patient Bizimana uzataramana n’abazitabira iki giterane yakunzwe bidasanzwe mu ndirimbo ze nka ‘Iyo neza’, ‘Amagambo yanjye’, ‘Menye neza’ n’izindi ndetse no mu bitaramo ngarukamwaka bikomeye akora kuri Pasika bizwi nka “Easter Celebration”.

Patient Bizimana agiye gutaramira ku ivuko i Rubavu

Bishop Harerimana Jean Bosco akoreshwa n'Imana ibitangaza bikomeye

)