Mbabazi Lilian, Cindy Sanyu na Jackie Chandiru, abanyempano mu guhanika ijwi bakunzwe bakibana muri Blue 3, bagiye kongera kwihuza baririmbane nk’itsinda.

Itsinda Blue 3 ryaciye ibintu muri Uganda by’umwihariko ndetse umuziki waryo umenyekana muri Afurika y’Uburasirazuba mu myaka 15 ishize. Ni bamwe mu bahanzi bubatse amateka akomeye mu muziki wa Uganda, batandukanye mu 2010 buri wese aca inzira ze.

Chimpreports yatangaje ko , Jackie Chandiru yaganiriye na kimwe mu binyamakuru muri Uganda ahishura ko hari gahunda yo kongera kwihuriza hamwe Blue 3 ikaza bundi bushya.

Jackie Chandiru wari umaze igihe adakora umuziki ku bwo kuba imbata y’ibiyobyabwenge, yashimangiye ko itsinda Blue 3 rizagaruka mu buryo bwihariye ndetse ko hari n’imishinga ryatangiye gukora rizatangiriraho.

Uyu mugore ufite indirimbo yitwa ‘Agaasi’, yahishuye ko bitarenze uyu mwaka, abafana bakunze Blue 3 mu gihe cyo hambere bazongera kuyibona mu buryo buzatungurana.

Cindy Sanyu,Lilian Mbabazi na Jackie Chandiru bagacishijeho mu myaka ya 2003-2008 ndetse icyo gihe Blue 3 bari bahuriyemo ryari rimwe mu matsinda yari akunzwe cyane mu ndirimbo nka Burn,Hitaji, Sanyuka Nawe, n’izindi nyinshi.

Ubukwe bwabo bwajemo kirogoya mu 2009 ari nabwo batangiye kuryana mu itangazamakuru kugeza ubwo mu 2010 bafashe umwanzuro wo gutandukana.

Uko ari batatu baratandukanye, buri wese asigaye akora umuziki ku giti cye. Cindy na Lilian babyaye batararushinga, Jackie we yatandukanye n’umugabo batarabyarana ndetse mu minsi yashize yanyoye ibiyobyabwenge by’umurengera kugeza ubwo byari bigiye kumuhitana.

Lilian Mbabazi yabaye igihe kinini mu Rwanda mbere y’uko ajya gukomeza amashuri ye muri Kaminuza ya Makerere muri Uganda. Icyo gihe yaririmbaga mu tubari n’amahoteli nko kuri Mango pub na Hotel des Mille Collines aho yakundaga gukorera ibitaramo afatanyije na Kidum.

Muri Makerere University yize mu ishami rya Social Sciences, ari nabwo yatangiye ibyo kuririmbana n’abahanzi bo muri Uganda.

Muri 2003 ni we wahuje bagenzi be Jackie Chandiru na Cindy Sanyu bashinga Blue 3 nyuma yo kumenyanira mu irushanwa rya Coca Cola Pop star.

Jackie Chandiru we yari amaze igihe yarabaswe n'ibiyobyabwenge

Lilian Mbabazi, umwe mu bagize uruhare rukomeye mu ishingwa rya Blue3

Cindy Sanyu, umwe mu bahanga bahoze bagize Blue3

)