Muri Kenya habereye irushanwa ry’ubwiza ryo gutoranya Nyampinga uhiga abandi mu bwiza mu cyiciro cy’abafite ubumuga bw’uruhu, hanatowe Rudasumbwa urusha abandi igihagararo n’ubumenyi.

Ni ku nshuro ya Gatatu iri rushanwa ribereye muri Kenya, ryateguwe n’ishyirahamwe rirengera inyungu z’abantu bavukanye ubumuga bw’uruhu [Albinism Society of Kenya] ku bufatanye n’ibindi bigo birishamikiyeho.

Emmanuel Silas Shedrack wo muri Tanzania ni we wahawe ikamba rya Rudasumbwa w’abafite ubumugu bw’uruhu mu gihe umukobwa witwa Maryanne Muigai yambitse ikamba rya Miss Albino.

Iri rushanwa ryahuje ibihugu bitatu bya Afurika y’Uburasirazu, Tanzania, Kenya na Uganda. Abatsinze batoranyijwe mu bakandida 30 bari bahataniye Mr &Miss Albinism East Africa 2018 mu birori byabereye i Nairobi mu mpera z’icyumweru gishize.

Ibirori byo gutora abahize abandi haba mu cyiciro cy’abagore n’abasore, byabereye mu nyubako ikomeye ya Kenyatta International Convention Centre (KICC).

Abatsinze bahawe ibihembo bitandukanye birimo amafaranga, ibikoresho by’itumanaho, kwambikwa n’inzu z’imideli zitandukanye n’ibindi.

Abateguye irushanwa bavuga ko rigamije kwereka Isi ko n’abafite ubumuga bw’uruhu bafite imbaraga n’ubumenyi bwafasha mu guhindura Isi.

)