Umunyamakuru Djihad yasabye imbabazi asaba ko yagabanyirizwa ibihano cyangwa akagirwa umwere mu byaha akurikiranyweho byo gusakaza amashusho y’urukozasoni y’umuhanzi Yampano n’umukunzi we.
Tariki ya 27 Gashyantare 2026 ni bwo Urukiko rw’Ibanze rwa Kicukiro rwahamije Uzabakiriho Cyprien uzwi nka Djihad, Kalisa John, Ishimwe François Xavier na Kwizera Papy Nestor icyaha cyo gusakaza amashusho yerekeranye n’imikoreshereze y’ibitsina, hakoreshejwe mudasobwa cyangwa urusobe rwa mudasobwa rubakatira imyaka 3 y’igifungo.
Muri bo, batatu bafungiwe muri gereza ya Mageragere mu gihe Kalisa John we yaburanaga ari hanze. Bahise bajuririra iki cyemezo mu Rukiko Rwisumbuye rwa Nyarugenge.
Mu iburanisha ryabaye ku wa 4 Gicurasi 2026, buri wese yahawe umwanya wo kwisobanura ku byaha ashinjwa. Uzabakiriho Cyprien, wari wabanje guhakana, yaje gusoza asaba imbabazi, anasaba ko yagabanyirizwa igihano cyangwa akagirwa umwere.
Kwizera Papy Nestor we yasabye ko yasubikirwa, agaragaza ko igihe amaze afunzwe cyamufashije kwiga no kwitegura guhinduka.
Ku ruhande rwa Ishimwe François Xavier, yakomeje guhakana ibyaha byose, nubwo raporo ya Cyber igaragaza ko ari we wasakaje ayo mashusho ndetse akayacuruza.
Kalisa John na we yavuze ko amashusho yayahawe ariko atigeze ayasakaza, anahakana ibyo umutangabuhamya yamushinje, avuga ko nyuma yaje kumusaba imbabazi. Yongeyeho ko nta ruhare yagize mu kuyaha undi muntu uwo ari we wese.
Ubushinjacyaha bwakomeje gushimangira ko hari ibimenyetso bihagije bishinja aba bantu, busaba Urukiko kudahindura icyemezo cyo gukomeze gukurikiranywa bafunzwe cyabanje, cyane cyane kuri Kalisa John, bukamusabira guhamywa ibyaha byose akurikiranyweho.
Urukiko rwatangaje ko ruzafata icyemezo nyuma yo gusesengura impaka zatanzwe n’impande zombi, rukazasoma umwanzuro ku wa 19 Gicurasi 2026 saa cyenda.
Ibitekerezo