Chorale Family of Singers ikorera umurimo w’ivugabutumwa muri EPR Paroisse Kiyovu yatangaje ku mugaragaro ko igitaramo cyayo ngarukamwaka cyiswe "Umuryango Mwiza Live Concert – Season III" kizaba ku Cyumweru tariki ya 20 Nzeri 2026, muri Camp Kigali.

Iki gitaramo kikaba kizongera guhuriza hamwe abakunzi b’umuziki wa Gospel mu ijoro ryihariye ryo kuramya no guhimbaza Imana.

Mu myaka ishize, Family of Singers yakomeje kwigarurira imitima y’abakunzi ba Gospel binyuze mu ndirimbo zifite ubutumwa bwimbitse ndetse n’ibitaramo bitegurwa ku rwego rwo hejuru.

"Umuryango Mwiza Live Concert" na yo izaba yubakiye kuri uwo murongo, aho hitezwe ibihe bidasanzwe byo kuramya Imana, guhimbaza no kwakira ubutumwa bwubaka ubuzima bw’abitabiriye.

Chorale Family of Singers isanzwe ifite igitekerezo cyo kubungabunga ubusugire bw’umuryango.

Mu gihe isi ikomeje guhura n’ibibazo bitandukanye birimo amakimbirane yo mu miryango, gatanya, ihohoterwa n’igabanuka ry’indangagaciro, Family of Singers yizera ko ubutumwa bwiza bwa Yesu Kristo bushobora kongera kubaka imiryango no kuyisubiza ku ndangagaciro z’urukundo, ukwizerana, kubabarirana, kubahana no kwizera Imana.

Binyuze mu ndirimbo, ubuhamya n’ibihe byo kuramya Imana, iyi Chorale igamije gukomeza kwibutsa Abanyarwanda ko umuryango ari wo shingiro ry’Itorero, sosiyete ndetse n’igihugu, bityo kubaka umuryango bikaba ari ugushyiraho umusingi ukomeye w’ejo hazaza.

Chorale Family of Singers igiye gukora igitaramo cy'anateka

Hagiye kuba igitaramo, Umuryango Mwiza Live Concert

)