Urukiko rwa gisirikare rwategetse ko umuraperi Fireman ndetse n’umusiriakare, Cpl Murwanashyaka Modeste baregwa gukubita no gukomeretsa bafungwa iminsi 30 y’agateganyo mu gihe hagikusanywa ibimenyetso.

Ni umwanzuro wafashwe kuri uyu wa Mbere tariki ya 6 Mutarama 2020 aho uru rukiko rwemeje ko Fireman ndetse na Cpl Murwanashyaka Modeste wigishaga i Iwawa bagomba gufungwa iminsi 30 y’agateganyo ku cyaha baregwa cyo gukubita no gukomeretsa.

Aba bombi bakurikiranyweho icyaha bakoreye mu kigo ngororamuco cya Iwawa aho bakubise uwitwa Gisubizo Fabien bakamuvuna igufwa ry’ukuguru kw’iburyo.

Fireman wari ushinzwe umutekano ashinjwa gufatanya n’uwari umwarimu Cpl Murwanashyaka Modeste mu gukubita uyu mugabo bamuziza kugenda nabi ku murongo.

Bagejejwe imbere y’urukiko tariki ya 31 Ukuboza 2019 baburana ku ifunga n’ifungurwa, bakaba basomewe uyu munsi aho urukiko rwategetse bagomba gufungwa iminsi 30 mu gihe hagikusanywa ibimenyetso.

)