Ikipe ya Patriots yongeye gusubira ikipe ya REG iyitwara igikombe cya shampiyona ni nyuma yo kuyitsinda mu mikino ya Playoffs 4 kuri 3, umukino wa nyuma wa kamarampaka Patriots yawutsinze ku manota 65 kuri 59 ya REG.
Wari umukino ugomba gusiga hamenyekanye ikipe itwara igikombe cya shampiyona umwaka w’imikino wa 2018-2019.
Ikipe yegukana igikombe yagombaga kuba yaratsinze imikino 4 ya playoffs. Uyu mukino ukaba wari uwa 7, imikino 6 yatambutse buri kipe ikaba yaratsinze 3, uyu ukaba ari wo wagombaga kuzikiranura.
Patriots niyo yatsinze umukino wa mbere wa Playoff, REG itsinda yakurikiyeho, Patriots irayigarukana itsinda indi 2 yatumye bagera ku mukino wa 7.
Agace ka mbere k’uyu mukino wabereye muri Kigali Arena, karangiye amakipe yombi anganya amanota 10-10. Mu gace ka kabiri Patriots yasize REG maze karangira ifite 35 kuri 23 REG.
Agace ka gatatu karangiye ku manota 48 ya Patriots kuri 44 ya REG.
Agace ka kane REG yakoresheje imbaraga nyinshi cyane ndetse igenda inagabanya ikinyuranyo cy’amanota, ubwo hari hasigaye amasegonda 28 hari hasigayemo amanota 2 gusa, REG yari ifite 59 kuri 61 ya Patriots.
Patriots yakomeje kwihagararaho maze umukino urangira ari amanota 65 ya Patriots kuri 59 ya REG inegukana igikombe cya shampiyona, akaba ari inshuro ya 2 yegukanye iki gikombe icyambuye REG kuko n’ubundi umwaka ushize yari yakiyitwaye.
Mu bagore ikipe ya APR yaraye yegukanye igikombe igitwaye The Hoops ni nyuma y’uko yabatanze imikino 4 The Hoops ifite imikino 2.
Ibitekerezo