Minisitiri w’Umuco na Siporo, Nyirasafari Espérance, yasabye by’umwihariko abanyamadini bafasha mu kumenyekanisha indangagaciro kugira ngo umuco nyarwanda ukomeze kubaranga hagamijwe gusigasira ibiranga abanyarwanda, birushaho kubahuza ndetse hubakwa n’izina ryiza hakoreshejwe indangagaciro zamuritswe.

Inteko Nyarwanda y’Ururimi n’Umuco (RALC) yamurikiye Abanyarwanda igitabo Nyobozi k’Indangagaciro remezo z’Umuco w’u Rwanda zatoranyijwe ku rwego rw’Igihugu.

Uyu muhango witabiriwe na Minisitiri wa Siporo, Nyirasafari Espérance, Minisitiri w’Urubyiruko, Mbabazi Rosemary, inzego zitandukanye zagize uruhare mu kwandika iki gitabo, inararibonye mu muco n’amateka by’u Rwanda ndetse n’itangazamakuru.

Intebe y’Inteko Nyarwanda y’Ururimi n’Umuco, Intiti Niyomugabo Cyprien ni we wagejeje ijambo ry’ikaze ku bitabiriye iki gikorwa ndetse anasobanura imvo n’imvano y’izina ryacyo n’icyo kizamarira abazagisoma muri rusange, n’Abanyarwanda by’umwihariko.

Yagaragaje ko iki gitabo kije guca akajagari k’ibitabo by’indangagaciro bigenda bigaragara hirya no hino mu Gihugu, aho buri wese ubishatse yandika indangagaciro uko abyuma kandi akandika ibimujemo. Ibi bigaragarira nko ku bigo by’amashuri, ku byapa biri ku mihanda n’ahandi.

Yakomeje avuga ko iki gitabo kizashyirwa mu ikoranabuhanga no mu burezi gifashe mu gutoza abana b’u Rwanda indangaciro z’umuco wabo.

Minisitiri wa Siporo n’Umuco, Nyirasafari Espérance, watangije iki gikorwa ku mugaragaro akanakiyobora kugeza kirangiye, yashimye iki gitabo nk’akazi kakozwe n’inzego zitandukanye.

Yagize ati "Mbere y’uko iki gitabo cyandikwa, wasangaga abantu bakoresha inyandiko zitandukanye kugira ngo bigishe Abanyarwanda indangagaciro z’umuco wacu. Ubu rero iki gitabo kizorohereza abantu gutanga amasomo adakuwe ahantu hatandukanye."

Minisitiri Nyirasafari yakomeje avuga ko iki gitabo nikimara kwemezwa no gusohoka mu icapiro, kizajya gikoreshwa mu kwigisha indangagaciro z’umuco w’u Rwanda mu byiciro bitandukane birimo umuryango, amashuri, Itorero n’ahandi hahurira abantu benshi.

Yasabye abitabiriye uyu muhango wo kumurika iki gitabo no kugitangaho ibitekerezo no kuzagira uruhare mu gutoza indangagaciro zigikubiyemo bahereye iwabo mu muryango.

Yagize ati ”Ndasaba cyane cyane abanyamadini ko mwazadufasha kumenyekanisha izi ndangagaciro kugira ngo turebe ko umuco wacu wakomeza kuturanga. Ibituranga birahari kandi nk’Abanyarwanda dukwiye kuba tubihuriyeho. Dukore, twubake izina ryiza dukoresheje izi ndangagaciro ziri muri iki gitabo.”

Avuga ku miterere y’iki gitabo n’ibigikubiyemo, Umuyobozi w’Ishami ry’Umuco mu Nteko Nyarwanda y’Ururimi n’Umuco, Dr. Nzabonimpa Jacques, yagaragaje ko “Igitabo Nyobozi ku Ndangagaciro remezo z’Umuco w’u Rwanda” gikubiyemo indagagaciro enye (4) zatoranyijwe ku rwego rw’Igihugu hagamijwe gutanga umurongo w’indandagaciro remezo Abanyarwanda bahisemo ngo zibabere umusingi w’iterambere.

Izo ndangagaciro ni izi zikurikira: Gukunda Igihugu, Ubumwe, Ubupfura n’Umurimo. Buri ndangagaciro remezo igiye ihatse izindi nyinshi ziyishamikiyeho ariko zose zigamije kurema Umunyarwanda nyawe w’umutima.

Mu rwego rwo gufasha abitabiriye kumva neza no gusobanukirwa ibikubiye muri buri ndagangaciro, hatanzwe ikiganiro kihariye kuri buri ndangagaciro.

Dr. Nzabonimpa ni we watanze ikiganiro ku ndangagaciro yo Gukunda Igihugu n’iy’Umurimo. Nkurayija Edouard wo muri Komisiyo y’Igihugu y’Ubumwe n’Ubwiyunge yatanze ikiganiro ku ndangagaciro y’Ubumwe.

Mu gihe Umubyeyi Colthilde wo Nteko izirikana yatanze ikiganiro ku ndangagaciro y’Ububupfura.

Nyuma y’ibi biganiro, habayeho umwanya wo kungurana ibitekerezo. Abatanze ibitekerezo bose bashimye iki gitabo ngo kuko kizafasha Abanyarwanda gusigasira umuco wabo ndetse bamwe basaba ko hakigwa uburyo bworoshye kandi bwihuse burimo kugihuza n’imigani ya kinyarwanda aho buri ndangagaciro yagira umugani uyikomokaho ndetse kikaba cyashyirwa mu ikoranabuhanga ku buryo ugikeneye yakibona bimworoheye.

)