Kwizera Olivier yakomeje kuba umugisha ku bahanzi bo muri Nigeria, nyuma yo gukundisha abanyarwanda indirimbo ’Anxiety’ ya Paddy K, ubu hagezweho ‘Soldier’ y’abahanzi TiMi, Kpee na Priesst.

Uyu munyezamu w’Ikipe y’Igihugu na Rayon Sports, Kwizera akomeje kumenyekanisha indirimbo z’abahanzi bo muri Nigeria, binyuze mu kumenyekanisha indirimbo zabo mu buryo buhambaye.

Mu minsi yashize ni bwo Kwizera Olivier yagaragaye arimo aririmba indirimbo ‘Anxiety’ y’umuhanzi Paddy K, ikaba yarahise ikundwa cyane mu Rwada bigera no kuri uyu muhanzi wahise ashimira uyu munyezamu uburyo yamufashije cyane.

Kuri ubu hagezweho indirimbo ‘Soldier’ y’abahanzi TiMi, Kpee na Priesst, aherutse kugaragara ayiririmba, bigatuma itangira guca ibintu ku mbuga nkoranyambaga, ikundwa cyane mu Rwanda.

Abinyujije kuri Instagram, TiMi Mafe yavuze ko ikintu gitangaje mu kwezi gushize yari mu Rwanda, akaba yarahakunze, na we yashimiye Kwizera.

Ati “Ikintu gitangaje ni uko nari ndi i Kigali mu kwezi gushize ariko ni ahantu heza cyane nigeze njya. Uyu ni Umunyezamu w’Ikipe y’Igihugu, nandikiwe n’abantu benshi cyane, ni ibintu byiza nigeze mbona mu buzima, ikintu gitangaje ni uko indirimbo yacu ‘Soldier’ iri mu zikunzwe mu Rwanda, ubu tugiye kujya ku mwanya wa mbere.”

Kwizera Olivier akaba ari umwe mu bakinnyi b’umupira w’amaguru mu Rwanda bakunzwe cyane ku mbuga nkoranyambaga n’ingeri zose yaba muri siporo no mu myidagaduro.

TiMi indirimbo ye Soldier ikomeje gukundwa cyane mu Rwanda kubera Kwizera Olivier

Kwizera Olivier akomeje kwandika izina akundisha abanyarwanda indirimbo zo muri Nigeria

)