Ku ikubitiro, irushanwa rya Miss Rwanda 2019 ryatangiriye mu Ntara y’Amajyaruguru mu Mujyi wa Musanze ahari butorwe abakobwa bazahagararira iyi ntara.

Ibikorwa byo gutoranya abakobwa bujuje ibisabwa bemerewe guhatanira Miss Rwanda 2019 byatangiye kuri uyu wa Gatandatu tariki ya 15 Ukuboza 2019 kuri La Palme Hotel iri mu Mujyi wa Musanze.

Bamwe mu bakobwa biyandikishije muri Miss Rwanda 2019 batangiye kugera ahabereye iki gikorwa guhera ku masaha y’igicamunsi mu runyuranyurane n’abari mu itsinda rigari ry’abanyamakuru babukereye ku gukurikirana iki gikorwa.

Abashinzwe ibikorwa by’ibarura no kwakira imyirondoro muri Miss Rwanda babwiye ISIMBI ko Intara y’Amajyaruguru yatangiriyemo ijonjora rya Miss Rwanda 2019 yiyandikishirijemo abakobwa 32 hasigayemo 15 bujuje ibyasabwaga.

Mu mateka y’u Rwanda hamaze gutorwa ba Nyampinga icyenda guhera mu 1991. Abatowe basimburanywe uhereye kuri Nubuhoro Jeanne (1991), Uwera Dalila (1992), Bahati Grace (2009), Mutesi Aurore (2012), Akiwacu Colombe(2014), Kundwa Doriane (2015), Mutesi Jolly(2016), Iradukunda Elsa (2017) na Iradukunda Liliane (2018).

Itorwa rya Miss Rwanda ryateguwe na Mashirika mu 2012, naho kuva mu mwaka wa 2014 isoko ryatsindiwe na Rwanda Inspiration Backup ku bufatanye n’abaterankunga bayo ku isonga, bakomeje kuyishyigikira no muri iki gikorwa cyo gushaka Nyampinga 2018 uzasimbura Iradukunda Liliane.

Abakobwa ba mbere batangiye kugera ahabera ijonjora mu Mujyi wa Musanze

Umukobwa wemererwa kwiyandikisha mu bahatanira kuba Miss Rwanda 2019 asabwa kuba afite icyangombwa cy’uko ari Umunyarwanda (Indangamuntu cyangwa Passport), ari hagati y’imyaka 18 kugeza kuri 24 y’amavuko, akoresha Ikinyarwanda neza ndetse n’urundi rurimi hagati y’Icyongereza, Igifaransa n’Igiswahili, afite uburebure butari munsi ya metero imwe n’ibice mirongo irindwi (1.70), afite Body Mass Index (BMI) ya 18.5 - 24.9.

Ibi byiyongeraho kuba atarigeze abyara, yiteguye kumara umwaka umwe mu Rwanda mu gihe yaba atowe, yiteguye kudashyingirwa mu gihe agifite ikamba, yiteguye guhagararira u Rwanda igihe cyose n’aho akenewe hose ndetse by’umwihariko no kuba yiteguye gukurikiza amategeko n’amabwiriza agenga irushanwa rya Miss Rwanda yose.

Ku ikubitiro Miss Rwanda 2019 yatangiriye mu Mujyi wa Musanze

Harashakishwa umukobwa w'ubwiza, ubuhanga n'umuco

Abanyamakuru bahageze ku bwinshi

Bamwe mu bakobwa bari kwakira abaje kwiyandikisha

Umukobwa wiyandikishije ari kubanza kwerekana imyirondoro ye akanapimwa

Umukobwa wiyandikishije asabwa kuba afite uburebure butari munsi ya metero imwe n’ibice mirongo irindwi (1.70)

Baranapimwa ibiro

Iki gikorwa cyabereye muri La Palme Hotel

)