Umuhanzi w’icyamamare muri Afurika y’Iburasirazuba, Diamond Platnumz, yatangaje ko agiye kugaruka gutaramira mu Rwanda mu gitaramo giteganyijwe tariki ya 29 Kanama 2026.
Iki gitaramo kiri mu rwego rw’urugendo rw’uruhererekane rw’ibitaramo bye yise “Retro Tour,” azakorera mu bihugu bitandukanye byo ku mugabane wa Afurika ndetse no muri Australia, agamije kwegera abakunzi be no kubasangiza ibihangano bye byakunzwe mu bihe bitandukanye.
Kuri gahunda ya Diamond bigaragara ko muri ibi bitaramo azataramira i Kigali tariki ya 29 Kanama 2026.
Diamond aheruka gutaramira i Kigali mu Ukwakira 2023, ubwo yari yitabiriye ibirori byo gutanga ibihembo bya Trace Awards.
Aya makuru aje akurikira ko uyu muhanzi agiye kongera guhurira ku rubyiniro n’umunyarwanda The Ben mu gitaramo kizabera muri Uganda.
Biteganyijwe ko bazataramira i Kampala ku wa 5 Kamena 2026, mu gitaramo kizwi nka “Comedy Store,” gitegurwa n’umunyarwenya Alex Muhangi.
Diamond na The Ben si ubwa mbere bahurira mu bitaramo byo muri aka karere, kuko no mu 2025 bari bahuriye mu gitaramo “Coffee Marathon UG,” cyabereye muri Uganda kikitabirwa n’abandi bahanzi bakomeye barimo Eddy Kenzo na Bebe Cool.
Aba bahanzi bombi kandi bahuriye ku ndirimbo “Why,” yakunzwe cyane mu Rwanda no mu bihugu by’akarere.
Ibitekerezo