AS Kigali yateye mpaga KCCA yo muri Uganda mu ijonjora rya kabiri rya CAF Confederations Cup, ni nyuma y’uko iyi kipe basanze nta bakinnyi buzuye bemerewe gukina uyu mukino, kubera ko abakinnyi benshi ba KCCA banduye icyorezo cya COVID-19.
Uyu mukino ubanza AS Kigali yari kuwakirira kuri Stade ya Kigali guhera saa Cyenda zo kuri uyu wa Gatatu.
Inama itegura umukino yahuje komiseri w’umukino n’abayobozi b’impande zombi mu gitondo cyo kuri uyu wa Gatatu, yemeje ko umukino utaba.
KCCA yageze i Kigali ku Cyumweru ifite abakinnyi 14 mu gihe havugwaga ko umutoza wayo mukuru, Mike Mutebi n’abandi bakinnyi 12 banduye COVID-19. Ku wa Mbere, myugariro John Revita yasanze bagenzi be i Kigali.
Ejo ubwo iyi kipe yakoraga imyitozo ya nyuma kuri Stade ya Kigali, ibisubizo yafatiwe i Kigali byagaragaje ko hari abandi bakinnyi babiri banduye COVID-19.
Mbere y’amasaha make ngo umukino ube, komiseri w’umukino yaje kwanzura ko AS Kigali iteye mpaga y’ibitego 2-0 kuko KCCA idafite abakinnyi bahagije bo gukina uyu mukino.
Itegeko rya CAF na FIFA rivuga ko buri kipe iba yemerwe kwandikisha abakinnyi 40, kandi ko umukino kugira ngo ube ni uko ikipe iba ifite abakinnyi 11 babanza mu kibuga barimo n’umunyezamu hakiyongeraho 4 b’abasimbura.
Iyo kandi ikipe inaniwe kujya gukina mu kindi gihugu kubera impamvu zirimo Coronavirus ikipe iterwa mpaga y’ibitego 2-0.
Iyo kandi ikipe bigaragaye ko nta bakinnyi bahagije ikipe ifite(11 na bane basimbura) ikipe nabwo iterwa mpaga y’ibitego 2-0. KCCA nyuma yo kurwaza abandi bakinnyi 2 ikaba yasigaranye abakinnyi 12 batemerewe gukina.
AS Kigali ikaba izajya gukina KCCA tariki ya 6 Mutarama 2021 muri Uganda ifite impamba y’ibitego bibiri.
Ibitekerezo