Adrien Misigaro, umuramyi w’umunyarwanda uba ku Mugabane wa Amerika, wamamaye mu ndirimbo ’Buri munsi’, ategerejwe mu Rwanda mu gitaramo cyiswe ’Hari Imbaraga Rwanda Live tour’ cyateguwe na Gentil Misigaro.

Yatumiye abaramyi n’amatsinda agezweho hano mu Rwanda hagamijwe kwamamaza ubutumwa bwiza.

Aba bahanzi barangajwe imbere n’umuramyi ukomeye Aime Uwimana, itsinda rya Alarm Ministries, Shekinah Worship Team y’i Masoro ndetse na Adrien Misigaro uba muri Amerika.

Ni igitaramo cyiswe ’Hari imbaraga Rwanda Tour’ kizabera muri Camp Kigali tariki 10 Werurwe 2019.

Gentil Misigaro wateguye iki gitaramo ni umuhanzi w’umunyarwanda uba muri Canada akaba azwi cyane mu ndirimbo zitandukanye zirimo; Buri munsi, Hano ku isi, Biratungana, Ngiy’indirimbo, Tuzanezerwa n’izindi.

Amakuru agera kuri ISIMBI.rw ni uko Gentil Misigaro azaba ari kumwe na Adrien Misigaro baririmbanye indirimbo ’Buri munsi’ yatumye amazina y’aba bahanzi bombi amenyekana cyane.

Adrien Misigaro akaba yemeje aya makuru ahamya ko agiye kuza mu Rwanda kwitabira igitaramo cy’umuvandimwe we Gentil Misigaro.

Iki nicyo gitaramo kibimburiye ibindi, Gentil Misigaro agiye gukorera mu Rwanda kuva yatangira umuziki ugamije kuramya no guhimbaza Imana.

Uyu muhanzi yemeza ko ari igitaramo kidasanzwe, kizaba giherekejwe n’umwuka w’Imana.

Yagize ati "’Hari Imbaraga Concert’ izaba idasanzwe kuko hashize igihe ngambirira kuza gutaramira mu Rwanda, kuko nabisabwe n’abantu benshi, ariko igihe cyari kitaragera."

Gentil Misigaro yunzemo ati "Iyi concert izaba idasanzwe kuko indirimbo zose zizakorwa nka: Biratungana, Hari imbaraga, Buri munsi, Umbereye Maso n’izindi nyinshi ziri kuri album nise ’Buri Munsi’ zifite amateka akomeye ndetse n’ubuhamya bufatika bw’ibintu Imana imaze gukora ibinyujije muri ziriya ndirimbo."

)