Itangazo ryashyizweho umukono na Rev. Karuranga Ephraim, umuvugizi w’itorero rya ADEPR kuri uyu wa 19 Ukuboza 2018, rirashimangira impinduka mu buyobozi bw’indembo muri ADEPR zamanuye Rev. Sebandende Emmanuel mu rurembo agashyirwa mu mudugudu.

Iri tangazo rivuga ko ADEPR Kuwa 12 Ukuboza 2018, ari bwo Biro nyobozi y’itoreo rya ADEPR mu Rwanda yakoze inama yafatiwemo umwanzuro wo guhinduranya abashumba b’indembo.

Mu bashumba b’indembo batahiriwe n’uyu mwanzuro, ni Rev. Sebadende Emmanuel wari umushumba w’ururembo rw’Amajyepfo wagizwe umukuru w’itorero mu itorero ry’Akarere ka Gasabo mu mujyi wa Kigali.

Ururembo rw’Amajyepfo rwahawe Rev. Kalisa Emmanuel wari umushumba w’ururembo rw’Umujyi wa Kigali asimbuye Rev. Sebadende Emmanuel wamanuwe mu ntera.

Rev. Kamanzi Callixte wari umushumba w’ururembo rw’Iburasirazuba wungirije. Yahawe kuyobora Ururembo rw’umujyi wa Kigali.

Umwanya Rev. Kamazi Callixte yari arimo wahawe Rev Ndikubwimana Geofrey wari umushumba w’Itorero ry’Akarere rya Muhanga. Mu gihe Rutayisire Pascal wari umushumba wa Paruwasi ya Runda muri Kamonyi yagizwe umushumba w’itorero ry’Akarere ka Muhanga.

Ibi bije nyuma y’amezi agera kuri abiri gusa hakozwe izindi mpinduka mu bashumba b’indembo cyane ko ku wa 04 Ukwakira 2018 aribwo haherukaga kuba impinduka mu bashumba kuri uru rwego.

Ku itariki 04 Ukwakira 2018 Rev. Sebadende Emmanuel yari yakuwe mu rurembo rw’Iburengerazuba yajyanywe mu Ntara y’Amajepfo none ahise akurwa mu bu buyobozi bw’ururembo agirwa umukuru w’itorero mu itorero ry’Akarere ka Gasabo.

Nubwo rimwe na rimwe abakirisito ba ADEPR binubira impinduka zikunze kuba mu bashumba b’indembo na za Paruwasi, abayobozi ba ADEPR bakunze kuvuga ko izi mpinduka zikorwa hagamijwe kunoza imikorere y’itorero n’iterambere ryaryo. Byose ngo bikorwa kubw’inyungu z’umurimo w’Imana.

Rev. Sebadende Emmanuel wayoboraga ADEPR mu ntara y’Amajepfo yakuwe kuri uwo mwanya agirwa umukuru w’itorero

Rev Kalisa Emmanuel wari umushumba w’ururembo rw’umujyi wa Kigali yagizwe umushumba mu ntara y’amajyepfo

)