Abakobwa batanu ba mbere bifuza kuzatorwamo Nyampinga w’u Rwanda, umwaka wa 2019, batoranyijwe mu Ntara y’Amajyaruguru mu ijonjora ribimburira andi azazenguruka igihugu.

Abakobwa batanu batsinze ijonjora ry’ibanze rya Miss Rwanda ryabereye mu Ntara y’Amajyaruguru ni Teta Mugabo Ange Nicole, Kabahenda Ricca Michaelle, Gacu Anitha, Ishimwe Bella, Munezezero Adeline.

Aba bakobwa batoranyijwe muri 15 bari bemerewe guhatana muri 32 bageze ahabereye ijonjora.

Abagize akanama nkemurampaka bavuze ko bitari byoroshye guhitamo abakobwa batambuka muri iri jonjora.

Iradukunda Michele yagize ati "Byari bigoye guhitamo abakobwa batoranyijwe kuko abaje bose bari bafite ubushake bwo guhagararira Intara y’Amajyaruguru."

Miss Mutesi Jolly yamwunganiye agira ati "Haba harimo ubwoba n’ibindi bitandukanye gusa utari bubashe gutsinda hano afite andi mahirwe yo kwiyandikisha mu kindi gice cy’igihugu."

Abatsinze ijonjora rya mbere i Musanze, uhereye ibumoso: Gaju Anitha (No.4), Ishimwe Bella (No.9), Kabahenda Ricca Michaella (No.10), Teta Mugabo Ange Nicole (No.2) na Munezero Adeline (No.6).

Ibikorwa byo gushakisha Nyampinga w’u Rwanda usimbura Iradukunda Liliane ku munsi ukurikiyeho, tariki 16 Ukuboza 2018, bizakomereza i Rubavu mu Burengerazuba mu gikorwa kizabera kuri Inzozi Hotel.

Ingengabihe ya Miss Rwanda 2019 igaragaza ko ijonjora ryo gushaka abakobwa bahatanira ikamba, rizagera mu Mujyi wa Huye wo mu Ntara y’Amajyepfo ku wa 22 Ukuboza mu gikorwa kizabera kuri Credo Hotel naho ku wa 23 Ukuboza hagatorwa abazaserukira Intara y’u Burasirazuba mu gikorwa kizabera ahitwa Silent Hill muri Kayonza.

Umujyi wa Kigali ukunda kwiyandikishirizamo abakobwa benshi uzagerwamo n’ibi bikorwa ku itariki ya 29 Ukuboza 2018 kuri Hill Top Hotel i Remera.

Abakobwa bazaba batoranyijwe mu Ntara zitandukanye no mu Mujyi wa Kigali bazatorwamo abajya mu mwiherero ku wa 5 Mutarama 2019 naho Miss Rwanda 2019 atorwe mu birori bikomeye bizaba ku wa 26 Mutarama.

VIDEO Y’UKO BYARI BIMEZE MU IJONJORA:

Ijonjora rya mbere rya Miss Rwanda ryabereye kuri La Palme Hotel i Musanze

Abakobwa batangiye kugera ahabereye iri jonjora ku gicamunsi

Babanzaga gupimwa uburebure, ibiro n'ibindi bisabwa

Abakobwa 15 nibo bari bemerewe guhatana

Abahatana berekanye ingendo n'ikimero

Abakobwa bitabiriye Miss Rwanda bazajya bahabwaga amanota na Mutesi Jolly wabaye Nyampinga w’u Rwanda mu 2016; Uwase Marie France ndetse n’umunyamakuru wa RBA, Iradukunda Michele

Iradukunda Liliane ukubutse mu Bushinwa muri Miss World yari yitabiriye iki gikorwa

Abagize akanama nkemurampaka bafata icyemezo ku bakobwa bakomeza

Gaju Anitha afite uburebure bwa 1.70m n'ibiro 52

Ishimwe Bella afite uburebure bwa 1.70m n'ibiro 58

Kabahenda Ricca Michaella afite uburebure bwa 1.73m n'ibiro 69

Teta Mugabo Ange Nicole afite uburebure bwa metero 1.74 n'ibiro 55

Munezero Adeline afite uburebure bwa 1.71m n'ibiro 76

)