Umunyezamu w’ikipe ya Rayon Sports, Kimenyi Yves, mu makipe 3 amaze gukinira harimo n’ikipe y’igihugu, avuga ko yahuye n’abakinnyi benshi kandi beza, akaba yahishuye ikipe y’abakinnyi 11 beza bakinanye, ni ikipe yaba itozwa na Mashami Vincent ndetse na Jimmy Mulisa nk’abatoza beza bamutoje.

Uyu musore yakiniye amakipe agera kuri 3, harimo Isonga yinjiyemo mu mwaka w’imikino wa 2011-2012, 2013-2014 ahita yerekeza muri APR FC, hari mbere y’uko mu mu ntangiriro za Nyakanga 2019 asinyira Rayon Sports.

Mu kiganiro yagiranye n’ikinyamakuru ISIMBI, yavuze ko bigoye gutoranya abakinnyi 11 beza bakinanye muri aya makipe yanyuzemo ukongeraho n’ikipe y’igihugu, gusa yavuze ko hari abo yabonye yakunze imikinire yabo kuri buri mwanya.

Iyi kipe y’abakinnyi 11 ahanini higanjemo abakinnyi bakinanye mu ikipe ya APR FC ndetse n’ikipe y’igihugu Amavubi.

Iyi kipe igizwe na Kimenyi Yves nk’umunyezamu akaba na kapiteni wa yo.

Ba myugariro: Michel Rushehangoga(bakinanye muri APR FC), Imanishimwe Emmanuel Mangwende(bakinanye muri APR FC), Abdul Rwatubyaye(bakinanye muri APR FC) na Nshutiyamagara Ismael Kodo(bakinanye muri APR FC), aba bose uretse Kodo abandi banakinanye mu ikipe y’igihugu.

Abakina hagati: Mugiraneza Jean Baptiste Migi(bakinanye muri APR FC n’ikipe y’igihugu), Haruna Niyonzima(bakinanye mu Mavubi), Iranzi Jean Claude(bakinanye muri APR FC, ikipe y’igihugu banakinana muri Rayon Sports) na Nkinzingabo Fiston(bakinanye muri APR FC)

Ba rutahizamu: Hakizimana Muhadjiri(bakinanye muri APR FC n’ikipe y’igihugu) na Jacques Tuyisenge(bakinanye mu ikipe y’igihugu Amavubi)

Iyi kipe ikaba yaba itozwa n’abatoza babiri b’abanyarwanda, Mashami Vincent ndetse na Jimmy Mulisa.

Dore ikipe ye uko yaba ihagaze mu kibuga

Haruna Niyonzima bakinanye mu Mavubi

Kodo utoza AS Kigali, iki gihe yakiniraga APR FC

Kimenyi Yves avuga ko yakinanye b'abakinnyi benshi kandi beza

Jimmy Mulisa na Mashami nibo baba batoza iyi kipe ye

)