Umuryango udaharanira inyungu ushinzwe kurengera uburenganzira bwa muntu (The Human Rights Foundation) watumije Janet Jackson, 50 Cent, Chris Brown, Tyga na Future nyuma yo kwitabira igitaramo cyiswe ‘Jeddah World Fest’ cyo muri Saudi Arabia.

Aba bahanzi bo muri Leta Zunze Ubumwe za Amerika bitabiriye igitaramo cyabaye ejo ku wa 18 Nyakanga 2019, bakaba bagiye kubazwa impamvu bahisemo amafaranga kuruta kurengera uburenganzira bwa muntu.

Aba bahanzi bagiye bavugwaho amagambo menshi ku mbuga nkoranyambaga nyuma y’uko batangaje ko bemeye kuzitabira igitaramo cyo muri iki gihugu cyizwiho kubangamira bumwe mu burenganzira bwa muntu burimo kubuza urubyiruko rw’abahungu n’abakobwa guhurira mu maresitora (restaurants), mu mashuri yisumbuye ya leta na kaminuza.

Nk’uko ikinyamakuru Urbanislandz.com kibitangaza, mu cyumweru gishize ni bwo umuraperi Nicki Minaj yasubitse ubutumire yari afite bwo kwitabira kiriya gitaramo cyabaye ejo hashize ku wa 18 Nyakanga 2019 kubera ibyemezo bikakaye bya guverinoma ya Saudi Arabia birimo kubangamira uburenganzira bw’igitsina gore ndetse n’ubw’abaryamana bahuje ibitsina.

Ku wa 3 w’iki cyumweru ni bwo abashinzwe gutegura igitaramo bagaragaje urutonde rushya rw’abahanzi bazitabira igitaramo ruriho ibyamamare bitandukanye nka Janet Jackson, Chris Brown, 50 Cent, Future na Tyga.

Uyu muryango ushinzwe kurengera uburenganzira bwa muntu wahise usohora itangazo ryihuse ritumiza bariya bahanzi ngo basobanure impamvu bemeye gutaramira muri Saudi Arabia.

Bati: “Biratangaje kubona ku munota wa nyuma ‘Jeddah World Fest’ itangaza abahanzi batabiriye iki gitaramo cyemewe kandi kigaterwa inkunga n’igikomangoma Mohammed Bin Salman, umwe mu bantu babi ku Isi bahonyora uburenganzira bwa muntu aho umwaka ushize yasohoye filimi ibuza abagore gutwara imodoka.”

Perezida w’uyu muryango udaharanira inyungu ushinzwe kurengera uburenganzira bwa muntu, Thor Halvorssen yavuze ko aba bahanzi bagomba Kugaragaza ko bashyigikiye uburenganzira bwa muntu mu gihe bari ku rubyiniro.

50 Cent umwe mu bahanzi batumijweho

)