Jimmy Mulisa, wakinnye umupira ku rwego mpuzamahanga, akaba n’umutoza yagaragaje abakinnyi be 11 b’ibihe byose mu mupira w’amaguru ku Isi kuri we, ni urutonde rwagiye rugaragaramo amwe mu mazina azwi cyane yaba abahagaritse gukina ndetse n’abagikina.

Uyu mugabo nyuma yo gutandukana na APR FC yatozaga mu mwaka ushize w’imikino, muri iyi minsi asa nutuje cyane aho avuga ko hari imishinga ye ahugiyemo harimo n’irerero ry’umupira w’amaguru ‘Urumuri Football Academy’ yatangije.

Abinyujije ku rukuta rwe rwa twitter, Jimmy yagaragaje abakinnyi 11 beza b’ibihe byose kuri we mu mupira w’amaguru.

Ni urutonde rwagaragayeho abakinnyi nka Ronaldo Luiz Nazario de Lima(Gifaru), Ronaldinho bo muri Brazil, umunya-Argentine, Diego Maradona. Aba bose bakaba barahagaritse gukina.

Mu bakinnyi bagikina hakaba harimo Cristiano Ronaldo ukomoka muri Portugal ukinira Juventus yo mu Butaliyani na Lionel Messi, umunya-Argentine ukinira FC Barcelona muri Espagne.

11 beza kuri Jimmy Mulisa

1. Thomas ’Tommy’ N’Kono

Thomas ’Tommy’ N’Kono ni umunyezamu w’umunya-Cameroun, benshi bafata nk’umwe mu banyezamu beza Afurika yagize, yavutse ku wa 20 Nyakanga 1956.

N’kono yakiniye amakipe atandukanye nka Canon Yaoundé, Tonnerre Yaoundé zo muri Cameroun, Espagnol muri Espagne, CE Sabadell FC (second level) na CE L’Hospitalet na zo muri Espagne akinira kandi na Club Bolivar muri Bolivia.

Cameroun yayikiniye imikino 112 kuva 1976 kugeza 1994. Yahagaritse gukina mu 1997. Yatwaranye igikombe cy’Afurika na Cameroun inshuro 2, mu 1984 na 1986.

2. Daniel Alves da Silva

Daniel Alves da Silva ni myugariro w’iburyo w’umunya-Brazil ukinira ikipe ya Sao Paulo y’iwabo muri Brazil kuva umwaka ushize.

Ni umwe mu bagabo beza bakina ruhago Isi yagize, yakiniye amakipe atandukanye kandi akomeye kuri iyi si ya rurema, yahereye muri Bahia y’iwabo muri Brazil, Seville na FC Barcelona zo muri Espagne, Juventus mu Butaliyani na PSG mu bufaransa.

Ikipe y’igihugu ya Brazil yayikiniye imikino 118 ayitsindira ibitego 8. Brazil batwaranye ibikombe birimo Copa América: 2007, 2019, FIFA Confederations Cup: 2009, 2013, FIFA World Youth Championship: 2003.

3. Roberto Carlos

Roberto Carlos ni myugariro wo ku ruhande rw’ibumoso wahagaritse gukina, akomoka muri Brazil, azwi cyane ku mashoti y’imbaragaga yagiraga. Yakiniye amakipe menshi atandukanye, twavugamo nka; Inter Milan yo mu Butaliyani, Real Madrid muri Espagne, Fenerbahçe. Yahagaritse gukina muri 2015 amaze gukina imikino 575 aho yatsinze ibitego 66.

Ni umwe mu bakinnyi bafashije ikipe y’igihugu ya Brazil, yayikiniye kuva mu 1992 kugeza 2006, mu mikino 125 yayitsindiye ibitego 11. Yahesheje Brazil ibikombe bitandukanye birimo n’igikombe cy’isi cya 2002.

4. Marcel Desailly

Marcel Desailly ni umufaransa wakinaga mu mutima w’ubwugarizi wahagaritse gukina muri 2006. Yakiniye amakipe nka Nantes na Marseille mu Bufaransa, AC Milan mu Butaliyani na Chelsea mu Bwongereza.

Yakiniye ikipe y’igihugu y’u Bufaransa kuva 1994 kugeza 2004, yahesheje u Bufaransa ibikombe bitandukanye harimo n’igikombe cy’Isi cyo mu 1998.

5. Virgil van Dijk

Virgil van Dijk ni umuholandi ukinira Liverpool mu Bwongereza, ni umwe mu bakinnyi beza bakina mu bwugarizi Isi ifite. Uyu musore w’imyaka 28 yakiniye amakipe arimo Groningen y’iwabo, Celetic yo muri Scotland, Southamptom na Liverpool zo mu Bwongereza.

Yatangiye guhamagarwa mu ikipe y’igihugu nkuru muri 2015 akaba amaze kuyikinira imikino 33.

6. Clarence Clyde Seedorf

Clarence Clyde Seedorf yahagaritse gukina muri 2014 ubwo yakinaga muri Brazil mu ikipe ya Batafogo, ni umuholandi wakiniye amakipe nka Inter Milan na AC Milan mu Butaliyani, Real Madrid, Ajax, mu mikino 640 yatsinze ibitego 100. Ubuholandi yabukiniye imikino 87 abutsindira ibitego 11.

7. Cristiano Ronaldo

Rutahizamu w’umunya-Portugal, ushobora gusatira izamu anyuze ku mpande cyangwa se ari nimero 9, umwe mu bakinnyi beza Isi yagize, yagiye ashyiraho uduhigo akuraho utundi, ubu akinira Juventus mu Butaliyani, yakiniye Mancehster United mu Bwongereza na Real Madrid muri Espagne. na Sporting CP y’iwabo yakuriyemo, aya makipe yayakiniye imikino 568 atsindamo ibitego 439. Ibikombe by’amakipe n’ibihembo bye ku giti cye yagwije mu kabati

Ni umwe mu bakinnyi bubashywe muri Portugal kuko yabashije gukora ibyananiye bakuru be, amaze kuyikinira imikino 164 ayitsindira ibitego 99, yayiheshije igikombe cy’u Burayi cya 2016 ari cyo kinamutandukanya n’abandi kuko bo byabananiye.

8. Ronaldo de Assis Moreira

Umunya-Brazil, Ronaldo de Assis Moreira wamenyekanye nka Ronaldinho Gaucho, yahagaritse gukina muri 2015, afatwa nk’umwe mu bakinnyi batarabona umusimbura, benshi bamwitaga umwami w’amacenga, yashimishaga abantu bitewe n’udukoryo twe ku mupira ariko twajyanaga n’ibikorwa, yakiniye amakipe nka Paris Saint Germain, Inter Milan, FC Barcelona n’andi menshi.

Brazil nkuru yayikiniye imikino 97 ayitsindira ibitego 33, yatwaye ibihembo byinshi ku giti cye umuntu atarondora, yahesheje Brazil ibikombe birimo igikombe cy’Isi cya 2002.

9. Ronaldo Luiz Nazario de Lima

Rutahizamu ufatwa nk’uw’ibihe byose ariko wakinnye igihe gito kubera kwibasirwa n’imvune, umunya-Brazil, Ronaldo Luiz Nazario de Lima benshi bitaga Ronaldo Gifaru, yahagaritse gukina muri 2011 ahanini bitewe n’imvune yagiye ahura na zo, ni umwe muri ba rutahizamu b’ibigango babayeho kandi bateraga ubwoba abo bahanganye, yakiniye amakipe nka Inter Milan, Real Madrid, Barcelona, PSV, Inter Milan na AC Milan. Yakinnye imikino 343 atsinda ibitego 247.

Brazil nkuru yayikiniye kuva 1994 kugeza 2011, mu mikino 98 yatsinze ibitego 62. Yahesheje Brazil ibikombe bitandukanye harimo ibikombe by’Isi 2 mu 1994 na 2002.

10. Diego Maradona

Rutahizamu wahagaritse gukina ukomoka muri Argentine, Maradona afatwa nk’umwe mu bakinnyi beza Isi yagize.

Yahagaritse gukina mu 1997, yakiniye amakipe nka Napoli, Barcelona, Sevilla n’andi menshi, mu mikino 491 yatsinze ibitego 259. Uyu mugabo uburyo yihutanaga umupira, gucenga ndetse azi no gutsinda byatumye yigarurira imitima ya benshi ndetse bamufata nk’uw’ibihe byose, yegukanye ibikombe n’amakipe yakiniye ndetse na we ku giti cye.

Ari mu ikipe y’igihugu ya Argentine mu mikino 91 yatsinze ibitego 34, yanayihesheje igikombe cy’Isi cya 1986.

11. Lionel Messi

Rutahizamu w’umunya-Argentine ukinira FC Barcelona muri Espagne, umwe mu bakinnyi bafatwa nk’uwa mbere ku Isi bitewe n’ibikorwa bye, nta gikombe gikinirwa ataratwarana n’ikipe ye ya FC Barcelona, nk’umukinnyi na we nta gihembo ataregukana mu rwego rw’ama clubs, bituma hahora impaka hibazwa umwiza hagati ye na Cristiano Ronaldo. Mu makipe makuru yakiniye Barcelona gusa, amaze kuyikinira imikino 478 ayitsindira ibitego 438.

Mu ikipe y’igihugu mu mikino 138 yayitsindiye ibitego 70, nta gikombe arahesha Argentine nkuru ari na yo mpamvu muri iki gihugu Maradona ari we wubashywe kumurusha.

Uko baba bahgaze mu kibuga

)